YouTube 影片


上个星期 ViuTV 嘅《IT 狗》迎嚟咗大结局,唔少人都想渠开续集,可以继续睇几位主演点样搞 "PayPayDuck"。《IT 狗》有冇续集都仲言之尚早,因为自 2016 年开台以嚟, ViuTV 制作咗唔少原创剧集,而当中有开续集 / 特别篇嘅剧集就比较少。不过由一班年轻演员担纲演出, 2020 年 3 月开播后大获好评又叫好叫座嘅《二月廿九》,就成为咗成功开拍续集嘅其中一套!


《二月廿九》本身系一套 10 集嘅科幻爱情剧,故事讲述喺 4 年先会出现一次嘅 2 月 29 号出世嘅女主角张丽纱 (Yeesa,由吴海昕饰演),喺 2017 年 2 月 28 号为自己庆祝生日,而当晚 11 点 59 分嗰刻,渠竟然穿越咗时空,去到 3 年后,天寒地冻嘅北海道,过程中仲遇上咗同渠命运相缠嘅两个男人—马智浩 (Ryan,由徐天佑饰演) 同埋余家聪 (会长,由刘俊谦饰演),最奇怪系呢两个男人都声称同 Yeesa 系相识嘅!过咗 24 小时之后,Yeesa 穿越返香港,发现现实其实只系过咗一秒钟,而且对自己嘅穿越能力更加不由自主,甚至竟然喺现实重新认识 Ryan 同会长,开启咗转动嘅命运齿轮……


呢套剧当年真系去咗北海道拍外景㗎!除咗剧情有追看性,个景亦令到唔少观众睇完都好想去!


而《940920》就系《二月廿九》嘅真‧续集,预计都会有 10 集!喺前作饰演会长嘅刘俊谦同饰演 Yeesa 嘅吴海昕其实喺 2020 年 10 月已经喺自己社交平台上载咗一条预告片,话畀大家知《940920》将会继续由黄智扬担任编审,罗嘉骏执导,并会承接《二月廿九》嘅世界观,主角将喺平行时空下发展新一段奇幻冒险之旅。嗰阵仲话已经进入咗剧本撰写阶段,期望可以喺 2021 年春季顺利喺香港同台湾开拍。最后就大家都知道,因为疫情持续,剧组去唔到台湾进行拍摄,所以就变咗全部景都系喺香港拍~

两位演员当时喺预告片嘅 caption 中仲有提到「由吴海昕、刘俊谦及蔡思韵主演」。咦?有睇过《二月廿九》嘅观众,或者只系睇咗上面故事简介,应该睇得出呢句介绍主角嘅句子,有一个人唔同咗—饰演 Ryan 嘅徐天佑唔见咗,新加入咗蔡思韵。之前监制兼导演罗嘉骏接受访问时有提过,原来 Ryan 呢条线喺《940920》并唔系主线。不过一日剧集未出街,一日都唔知成个故事嘅走向~已知嘅就只有《940920》系围绕住两个时空互相交织所发生嘅故事。

通常一套剧集或者电影开拍续集,都好常见到个名系《乜乜乜 2》,但系点解延续《二月廿九》嘅故事会叫《940920》呢?呢个真系要有睇过嘅人先会知道—「940920」系 Yeesa 第一次穿越去 2020 年嘅北海道嗰阵,会长畀 Yeesa 嘅密码,同时亦系会长妈妈嘅死忌嚟。

本身《940920》会喺 2 月 28 号首播,不过导演前排就喺自己社交媒体上表示,虽然后期进度良好,但系排唔到喺 2 月 28 号呢个期上,所以会延后一个星期,即系 3 月 7 号播!(时间都出埋了:逢星期一至五夜晚 9 点半!)

讲咗咁多,不如趁呢个时间嚟重温下《二月廿九》一啲主要角色嘅简介:


张丽纱 (Yeesa)|吴海昕 (Sofiee) 饰演
演员 IG:https://www.instagram.com/sofiee_ng
Yeesa 系港日混血儿,1992 年 2 月 29 日喺日本札幌护国神社出世,妈妈喺生咗渠之后就难产而死。分别喺 2017、2018、2019 年 2 月 28 日三度穿越,而呢三次嘅穿越都令渠知道咗一啲唔同嘅事,例如知道自己系会遇到车祸同埋点解会遇到车祸。喺 2020 年 2 月 29 日因为有唔同时空嘅自己多次阻挠香川二郎呢个为咗个仔赚医药费嘅送货司机,而遇上车祸,Ryan 为咗救渠而死,渠想牺牲自己救返 Ryan,最后成功穿越返去 2020 年 2 月 29 日夜晚大约 9:30 左右,不过今次就变咗会长为渠牺牲自己条命。而渠喺 2021 年 2 月 28 醒返,发现只有自己仲存有对会长嘅记忆。

喺《940920》嘅故事,Yeesa 就会去到另一个新时空,当然亦会发生好多事,渠究竟会唔会返去呢?又会唔会同呢个时空嘅 Ryan 同会长发生啲咩事呢?


余家聪 (会长)|刘俊谦 (Terrance) 饰演
演员 IG:https://www.instagram.com/lauchunhim.terrance
余家聪系神圣几何学会嘅会长,亦系一位哲学博士。喺 2020 年 2 月 29 日嘅北海道救返被警察追捕嘅 Yeesa,并且自称系渠男友。喺 Yeesa 为咗救 Ryan 而进行第四次穿越期间,就代替希望牺牲自己嘅 Yeesa 被香川二郎撞死。最后因为历史嘅改变,渠变成咗一位作家,仲出咗一本叫《二月廿九》嘅小说,然而渠已经失去所有对会长呢个身分同经历嘅记忆,亦唔再认识 Yeesa。

而渠亦系知道 Yeesa 每年 2 月 28 日可以有 24 小时穿越能力嘅人。

不过嚟到《940920》嘅平行时空下,渠就变成咗主体,仲会同新加入嘅蔡思韵所饰演嘅林楚凝有所交集!究竟点解渠会变咗神圣几何学会嘅会长?同 Yeesa 又会有咩?


马智浩 (Ryan)|徐天佑 饰演
演员 IG:https://www.instagram.com/Chuihammer
Ryan 本身系喺超级市场工作嘅寿司师傅,之后辞职转咗去一间寿司店做学徒。喺 2020 年 2 月 29 日,日本时间 00:00 嘅北海道救返差啲被电车撞倒嘅 Yeesa,不过同日夜晚当渠送受伤嘅 Yeesa 去医院嗰阵,就畀香川二郎撞死,最后喺 Yeesa 为咗救渠第四次穿越时,就由会长代替咗渠牺牲。

由于剧中 Ryan 经常默默守护住 Yeesa,所以当时有份追剧嘅网民,就帮渠改咗个外号叫「兵佑」。

上面提及导演讲过《940920》里面 Ryan 唔会系主线,唔知真正出街嗰阵,喺新嘅平行时空下,渠同 Yeesa 又会唔会有新嘅发展呢?

而演员徐天佑除咗饰演主角之一外,仲为《二月廿九》创作咗插曲〈四年一遇〉,一手包办主唱/作曲/作词/编曲/歌曲监制。希望《940920》都会有渠创作嘅歌曲啦!



《940920》新角色
林楚凝|蔡思韵 (Cecilia) 饰演

演员 IG:https://www.instagram.com/ceciliachoii
当大家都以为神圣几何学会系余家聪创立嘅时候,《940920》话你知,其实林楚凝先系呢个神圣几何学会嘅创立人兼会长,仲收咗余家聪做第一个会员。

渠究竟系咩人?渠同余家聪会有啲咩「瓜葛」?点解渠又会无啦啦将会长呢个位交畀余家聪?如果同小薯仔一样,成个脑都充满疑问,咁就一定要留意播出后嘅剧情发展!


一位大家都非常熟悉嘅资深演员—余子明 (即系以前喺《封神榜》饰演姜子牙嗰位),都有份参与拍摄!虽然未知渠喺剧中饰演咩角色,但系对观众嚟讲,都系充满新鲜感嘅阵容!

相信大家同小薯仔一样都非常期待剧集播出,如果想唤醒返自己对剧情同角色嘅记忆,都可以喺《940920》播出前,睇返《二月廿九》先:https://viu.tv/encore/leap-day

注意:已更新剧集嘅真正预告!


撰文:小薯仔
资料来源:ViuTV《二月廿九》剧集重温页面、维基百科及各媒体报导
照片来源:ViuTV《二月廿九》剧集重温页面、刘俊谦 Facebook 上载之预告片截图、吴海昕 Facebook、刘俊谦 、徐天佑、蔡思韵、罗嘉骏、@yeesa_cheung Instagram


延伸阅读:
【睇电视2022】ViuTV 新剧《反起跑线联盟》3月21日开播!
https://timable.com/zh-hk/blog/2147764

【睇电视2022】ViuTV 篮球剧《季前赛》睇MIRROR同ERROR喺球场上挥洒汗水!
https://timable.com//zh-hk/blog/2128581

【睇电视2022】新运动剧《i.SWIM》继续青春热血!
https://timable.com/zh-hk/blog/2126092

【Call For COLLAR】《全民造星IV》女团正式出道
https://timable.com/zh-hk/blog/2119980


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app