YouTube 影片


篮球都可算系其中一种比较常见嘅运动剧题材,只系讲亚洲地区都可以諗起好几套,相信亦系唔少人嘅青春影视回忆。而嚟到 2022 年,ViuTV 除咗游水剧《i.SWIM》之外,都会有套新嘅篮球剧—用街头篮球做主线嘅《季前赛》。


《季前赛》由电影 / 广告导演袁剑伟执导 (袁导演亦兼任埋呢套剧嘅编审),暂时预计有 20 集。主要讲述 3 个热爱篮球嘅男仔—高家孝 (由姜涛饰演)、关浩德 (由吕爵安饰演) 同张智良 (由邱士缙饰演) 曾经系街场嘅常客,但因为各自唔同嘅原因就放弃咗篮球。

一次香港首屈一指嘅大学篮球队 B 队扫场事件,渠哋 3 个都畀丧波 (由张继聪饰演) 临时拉伕加入去「守护街场」,仲合力「赶走」咗 B 队球员。不过由卓立锋 (由陈卓贤饰演) 带领嘅大学篮球队 A 队知道呢件事后,当然唔甘心,于是成班队员去「踩场」,而且今次仲成功「复仇」!最后为咗面子,两边就立咗个「六星期之约」,约定再对战。

呢件事后,令大家慢慢重拾返篮球梦,而丧波就做咗渠哋嘅教练,仲搵埋朱昆润 (由梁业饰演) 同杨舜光 (由 193 饰演) 加入。呢 5 个人,再加个教练,就去挑战全港各区嘅大小街场,亦逐渐令呢队「杂牌军」变成有组织嘅正规篮球队。


拍运动剧嘅演员就未必个个都有玩开嗰项运动嘅,不过今次出演嘅大部份男性演员,据渠哋自己所讲,每个人读书时期都有打开波,甚至系而家成为咗艺人,都仍然有继续打。当中姜涛同张继聪都系众所周知,钟意打篮球嘅表表者,而 193 以前更加系南华篮球少年队嘅一员!

暂时嘅故事简介,其实睇落都算几详细,但系呢套剧喺 2022 年 1 月先开拍,到而家仍然都仲系处于拍摄阶段,距离煞科,甚至系播出都有一段好长嘅时间~都系嗰句,剧集一日未出街,一日都未知当中嘅剧情走向嘅!咁不如趁而家先睇下以下一啲剧集角色嘅简介啦:

* 简介系根据出演该角色嘅演员喺开镜记者会上嘅介绍所整理,之后有更新的话都会再加返
* 因为未有真‧造型嘅剧照,所以有啲演员暂时会摆其他相;亦由于篇幅所限,未能摆上每位演员 (角色) 嘅相,敬请见谅


街头篮球队


高家孝|MIRROR 成员姜涛 饰演

演员 IG:https://www.instagram.com/keung_show
高家孝系一个打波好叻嘅快餐店店员。

渠放弃篮球嘅原因唔知会同咩有关系呢?

而饰演呢个角色嘅姜涛本身就好钟意打波,所以渠话会「寓工作于娱乐」~


关浩德|MIRROR 成员吕爵安 (Edan) 饰演
演员 IG:https://www.instagram.com/edanlui
关浩德系一间体育用品店嘅太子爷,有个好锡渠嘅爸爸同成日闹渠又好烦嘅家姐,而兴趣系唔做嘢。

不过渠喺篮球场上都有强项㗎,就系射波,司职小前锋。


张智良 (张良)|MIRROR 成员邱士缙 (Stanley) 饰演
演员 IG:https://www.instagram.com/stanleysc_
张智良系一位广告服务客户经理。

渠喺剧中仲有两条感情线㖭啊!会系同边两位女演员呢?同小薯仔一样想知的话,到时剧集播出后就一定要留意~


(左:猪润,右:光仔)

朱昆润 (猪润)|ERROR 成员肥仔 (梁业) 饰演
演员 IG:https://www.instagram.com/fatboyip
猪润系一位快餐店经理。

渠喺篮球场上嘅身份系一名得分射手,自称喺球队里面系靠「符碌」同运气。

杨舜光 (光仔)|ERROR 成员193 (郭嘉骏) 饰演
演员 IG:https://www.instagram.com/deniskwok193
光仔系个无业嘅废青,重疑似系跟咗黑社会大哥,不过就跟唔成咁。

但系喺篮球场上,渠嘅身份就变咗一个大前锋,负责抢篮板。


陈尚波 (丧波)|张继聪 (Louis) 饰演
演员 IG:https://www.instagram.com/louischeung2013
丧波虽然正职系一位小巴司机,但系其实渠以前系一个篮球高手嚟㗎!可惜岁月催人,渠条腰出咗问题,唔可以继续打篮球。

成日都笑上面 5 个年轻人,有时又折磨下渠哋,不过见到渠哋好有潜质,于是乎就同渠哋组织咗呢队球队,仲发生咗好多热血嘅故事~

翰林大学篮球队 A 队


卓立锋|MIRROR 成员陈卓贤 (Ian) 饰演

演员 IG:https://www.instagram.com/iancychan
卓立锋系好典型嘅篮球精英,亦系好出名嘅大专篮球员。中学打学界,升到大学就打大专篮球比赛,已经半只脚踏咗入职业联赛。

而现实中,演员陈卓贤喺打排球并成为香港男子成年排球代表队队员前,其实系开始打篮球先嘅!当年渠读书嘅时候,每日放学后都系先练完篮球,再练排球。不过后来发觉咁样太攰,所以先专注打排球。


(左:阿秋,右:男神)

陈国秋 (阿秋)|陈安立 (Brian) 饰演
演员 IG:https://www.instagram.com/bluebanana8
阿秋系卓立锋「背后嘅男人」,系渠嘅好兄弟兼队友。喺球队里面系相对比较成熟嘅一员,经常担任「和事佬」嘅角色。

而演员陈安立以前同邱士缙系中学师兄弟,系校队队友之余,两个人亦有一齐打街场,渠而家都有加入艺人篮球队㗎!

男神 (暂时未知道角色名,所以以演员对角色嘅形容作代替)|P1X3L 成员吴启洋 (Phoebus) 饰演
演员 IG:https://www.instagram.com/phoebus_ng
「男神」系个善良嘅球员。喺渠嘅世界入面,所有嘢都系粉红色,好美好~

演员吴启洋喺现实中,开始打手球,成为港队 U16 手球代表队成员前,渠其实都系开始打篮球先㗎!

其他角色
九姐|练美娟 (娟姐 / Florica) 饰演

演员 IG:https://www.instagram.com/linkuen13
九姐系一位快餐店嘅总经理。处事认真,而且不平则鸣,工作上亦比较严厉。

虽然剧里面未必有渠打篮球嘅剧情,但系唔讲唔知,喺现实,演员练美娟以前真系学校嘅篮球校队队员嚟!

关瑜欣 (关家姐)|李敏 (Ranya) 饰演
演员 IG:https://www.instagram.com/ranyayaya
冇错,关家姐就系关浩德嘅家姐。因为妈妈过咗身,身为长女同女强人嘅渠要负上照顾家庭 (爸爸同细佬) 嘅责任,所以个性比较硬朗,有时甚至会有啲心狠手辣。

渠亦会成日都闹细佬关浩德。

何玛莉 (河马)|葛绰瑶 (Yoyo) 饰演
演员 IG:https://www.instagram.com/Yoyo_kot
河马系一个就读会计系嘅大学四年级学生,同时亦系球队军医。

睇完角色简介,相信大家都同小薯仔一样,对到时播出嘅成品有所期待!究竟一路打开街场嘅球员,对上一直受正统篮球训练嘅球员,会擦出咩火花呢?而街头篮球队嘅成员又会点样磨合?一班人气偶像喺剧中一齐打波又系点嘅样?大家一齐拭目以待啦!

喺呢刻未睇到游水,又未睇到篮球,想睇下其他运动剧感受返嗰股热血同冲劲?小薯仔都搵咗两套同样系 ViuTV 出品嘅:
空手道 - 《打天下》https://viu.tv/encore/warriors-within
男子排球 - 《男排女将》https://viu.tv/encore/we-are-the-littles

注意:呢篇文章所放出嘅只系 2021 年嘅《ViuTV 2022》上所播出嘅宣传片段,并未系剧集嘅真正预告。当真正预告释出嘅时候就会更新返。


撰文:小薯仔
资料来源:ViuTV《季前赛》记者会、维基百科及各媒体报导
照片来源:ViuTV YouTube 上载之宣传片截图;吕爵安、邱士缙、梁业、193 及吴启洋 Instagram;张继聪、陈安立 Facebook


延伸阅读:
【睇电视2022】ViuTV 新剧《反起跑线联盟》3月21日开播!
https://timable.com/zh-hk/blog/2147764

【睇电视2022】ViuTV 新运动剧《i.SWIM》继续青春热血!
https://timable.com/zh-hk/blog/2126092

【睇电视2022】ViuTV《二月廿九》续集《940920》3月7日开播!
https://timable.com/zh-hk/blog/2125672

【Call For COLLAR】《全民造星IV》女团正式出道
https://timable.com/zh-hk/blog/2119980


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app