香港电影金像奖由 1982 年开始举行,去到今年已经嚟到第 40 届。有人会问,2022 年唔系应该系第 41 届咩?理论上系嘅,但系 2020 年 9 月金像奖大会就宣布,因为疫情一直变化,戏院喺 2020 年大部分时间都未能够正常营业,令到该年预期会上映嘅电影要大幅度延期,所以第40届香港电影金像奖颁奖典礼就会顺延去到 2022 年举行。

而且今届仲有个特别之处—本身符合金像奖参选资格嘅其中两样条件,系需要喺该届颁奖礼举行前一年嘅 1 月 1 日至 12 月 31 日香港作首轮公开售票放映,并连续 7 日内于 50 个座位以上嘅常规放映电影场地上映不少于 5 场嘅香港电影。但系正如上面提到,因为疫情关系,2020 年戏院关闭时间较长,然后好多电影都要延期上映,于是乎颁奖典顺延之余,2020 同 2021 年符合资格嘅大约 70 套电影都合并埋喺同一届竞逐。

咁金像奖嘅各个奖项又点决定入围名单同最终得奖者呢?除咗属于非常设奖项嘅「终身成就奖」同「专业精神奖」外,其余 19 个奖项都会经 2 轮:第 1 轮会由已向香港电影金像奖协会登记而又被核实嘅合资格「香港电影金像奖选民」同「第一轮专业评审团」各占 50% 嘅投票选出每个奖项嘅提名名单;第 2 轮就系由「第二轮专业评审团」、金像奖十四个属会会员,联同香港作曲家及作词家协会会员选出得奖者。如果想了解更多评选方法,可以去 http://www.hkfaa.com/rules.html 睇返详情。

讲完一大轮金像奖嘅背景,不如简介下今届有份入围各个奖项嘅电影啦(包含香港电影 17 套及亚洲华语电影 3 套):

1. 由于篇幅所限,未能放上每套电影嘅海报片同预告,敬请见谅
2. 金像奖对香港电影嘅定义为符合以下条件其中两项:导演系持有香港永久性居民身份证嘅香港居民 / 出品公司 (最少 1 间) 系香港合法注册公司 / 必须最少有 6 个工作项目嘅工作人员系持有香港永久性居民身份证嘅香港居民,而每个工作项目只计算一位,依据 15 个奖项计算
3. 获得最佳原创电影歌曲提名嘅电影会将该首歌曲放埋出嚟


香港电影


《智齿》

导演:郑保瑞
主演:林家栋、刘雅瑟、李淳及池内博之
预告:https://www.youtube.com/watch?v=e6ZUJMVNXNw

故事讲咩:啱啱由学堂毕业嘅任凯(李淳饰演)因为一单连环凶杀案,同刚复职嘅斩哥(林家栋饰演)开始成为拍档。不过破唔到案之余,反而引发咗一连串事故⋯⋯一方面,斩哥撞返杀渠妻儿嘅街童(刘雅瑟饰演),被激发嘅恨意一发不可收拾;另一方面,任凯因为一时大意,唔见咗自己枝佩枪,仲唔觉意被凶手攞到。呢个凶手潜伏喺城市之中,令危机逐步逼近⋯⋯

呢套电影改编自中国知名犯罪心理小说作家雷米嘅同名小说,系入围电影中唯一一套以黑白拍摄,亦喺今届金像奖获得 14 项提名,包括最佳电影、最佳导演、最佳编剧、最佳男主角、最佳女主角、最佳女配角、最佳摄影、最佳剪接、最佳动作设计、最佳美术指导、最佳服装造型设计、最佳原创电影音乐、最佳音响效果同最佳视觉效果,可以话系提名数量上嘅大赢家。


《梅艳芳》
导演:梁乐民
主演:王丹妮、刘俊谦、廖子妤、林家栋、古天乐、杨千嬅及杨佑宁
预告:https://www.youtube.com/watch?v=2RU_-1yw9Dw

故事讲咩:根据巨星梅艳芳嘅真实经历稍作改编,由王丹妮饰演梅艳芳。4 岁喺荔园登台嘅小歌手,到成为风靡亚洲嘅舞台天后,再到人生最后一段路,同埋感情生活、同家姐嘅相处,以及对工作对朋友对香港嘅付出,都有喺电影中呈现。

或者你未必清楚知道「梅艳芳」背后嘅故事,但系小薯仔相信,香港应该大部分人最起码都一定会听过「梅艳芳」呢个名,听过 / 睇过渠一啲代表作。而呢套电影就系将呢位「香港女儿」嘅传奇一生搬上银幕,重现当时情怀。

喺今届金像奖获得 12 项提名,包括最佳电影、最佳导演、最佳女主角、最佳男配角、最佳女配角、最佳新演员、最佳摄影、最佳美术指导、最佳服装造型设计、最佳原创电影音乐、最佳音响效果同最佳视觉效果,提名数量仅次于《智齿》。

* 廖子妤凭呢套电影及《智齿》获得两个最佳女配角提名;王丹妮亦凭呢套电影同时获得最佳女主角及最佳新演员提名。


《浊水漂流》
导演:李骏硕
主演:吴镇宇、蔡思韵、谢君豪、李丽珍、朱栢康、宝珮如及柯炜林
预告:https://www.youtube.com/watch?v=Dive0mfX_UM
主题曲:〈浊水漂流〉(主唱:黄衍仁)
https://www.youtube.com/watch?v=dunxtsO0nCQ

故事讲咩:啱啱出册嘅辉哥 (吴镇宇饰演) 返到去深水埗街角,重遇一班街友—越南难民 老爷 (谢君豪饰演)、洗碗工 陈妹 (李丽珍饰演)、毒瘾好深嘅大胜 (朱栢康饰演) 同埋半身不遂嘅阿兰 (宝珮如饰演)。然而正正喺呢晚,就遇上食环署人员「洗太平地」,渠同班街友嘅家当尽失。一位刚毕业嘅社工何姑娘 (蔡思韵饰演) 协助渠哋打官司申请索偿,并要求政府道歉。喺渠哋另觅居所嗰阵,仲识咗个口齿不清嘅年轻街友叫木仔 (柯炜林饰演),于是合力搭建小木屋群,相依为命。可惜天桥底下毕竟龙蛇混杂,一班街友看似平静嘅生活再次被打破,而一次意外更令渠哋被逼四散。

呢套电影亦系改编自真人真事,同时更加难得地集合咗吴镇宇、谢君豪同李丽珍三位金马奖影帝影后,而吴镇宇除咗担任男主角外,亦身兼出品人一职。

喺今届金像奖获得 11 项提名,系提名数量第 3 多嘅电影,包括:最佳电影、最佳编剧、最佳男主角、最佳男配角 x2、最佳女配角、最佳新演员、最佳美术指导、最佳原创电影音乐、最佳原创电影歌曲及新晋导演。

* 柯炜林凭呢套电影同时获得最佳男配角及最佳新演员提名。


《妈妈的神奇小子》
导演:尹志文
主演:梁仲恒、吴君如、冯皓扬、张继聪、卢海鹏及钱小豪
预告:https://www.youtube.com/watch?v=uo5yR2w8Z04
主题曲:〈神奇之路〉(主唱:柳应廷)
https://www.youtube.com/watch?v=kZItlJawxvw

故事讲咩:苏桦伟 (少年:冯皓扬 / 成年:梁仲恒 饰演) 一出世就被诊断患上黄疸病,导致脑部受损,注定一生都系个弱听同四肢痉挛的残疾人士。不过苏妈 (吴君如饰演) 坚持要救个仔,仲决定就算阿仔到 80 岁都行唔到,都会孭住渠行。然而奇迹出现—伟仔唔止慢慢长大,仲学识行路,甚至被发掘出跑步天赋!少年时代开始加入残障人士田径队,同苏妈一齐奋斗嘅渠,之后就成为咗家传户晓嘅「神奇小子」─ 喺 1996 年夏季残疾人奥林匹克运动会为香港拎到历史性嘅第一金,到 2008 年夏季残疾人奥林匹克运动会,攞到男子200 米金牌外,亦打破咗呢个项目嘅世界纪录。

呢套系改编自退役伤健运动员苏桦伟经历嘅传记电影。而吴君如除咗饰演「苏妈」一角,亦系电影嘅监制。值得一提嘅系,呢套电影有获提名代表香港角逐第 94 届奥斯卡金像奖最佳国际影片㗎!

而喺今届金像奖获得 9 项提名,包括:最佳电影、最佳编剧、最佳男主角、最佳女主角、最佳男配角、最佳新演员 x2、最佳原创电影音乐及最佳原创电影歌曲。

* 梁仲恒凭呢套电影同时获得最佳男主角及最佳新演员提名;冯皓扬凭呢套电影同时获得最佳男配角及最佳新演员提名

《怒火》
导演:陈木胜
主演:甄子丹、谢霆锋及秦岚
预告:https://www.youtube.com/watch?v=mX7D4z9dcOA
主题曲:〈对峙〉(主唱:谢霆锋)
https://www.youtube.com/watch?v=ffV6pfErPxg

故事讲咩:重案组督察张崇邦 (甄子丹饰演) 围剿国际毒枭嗰阵,遇上了一班「黑吃黑」嘅蒙面悍匪屠杀警察。张崇邦努力追查悍匪行踪时,发现悍匪首领竟然系昔日战友邱刚敖(谢霆锋饰演),邱刚敖曾经系警队明日之星,甚至当然时同张崇邦亦师亦友。当渠哋再次见面,一切恩怨,系时候嚟个了断⋯⋯

电影喺 2019 年 7 月开拍,不过身兼监制嘅陈木胜导演喺拍摄期间证实患上末期鼻咽癌,并喺 2020 年 8 月逝世,所以就成为咗渠嘅遗作。

喺今届金像奖获得 8 项提名,包括:最佳电影、最佳导演、最佳摄影、最佳剪接、最佳动作设计、最佳原创电影歌曲、最佳音响效果及最佳视觉效果。


《手卷烟》
导演:陈健朗
主演:林家栋、Bipin Karma、袁富华、白只及太保 (张嘉年)
预告:https://www.youtube.com/watch?v=URQwUksdR7E

故事讲咩:退役华籍英军关超 (林家栋饰演) 加入黑社会维生,但近年经济不景,成日入不敷支。一日,南亚裔古惑仔文尼 (Bipin Karma 饰) 为躲避仇人,误闯关超屋企,仲以一百万酬劳哀求渠收留五日,关超欣然接受。另一边厢,关超早前促成咗江湖大佬大口泰 (袁富华饰演) 同台湾黑帮菜甫 (杜燕歌饰演) 嘅金钱龟走私交易,大口泰收货后竟发现货不对办,仲要关超交返 150 万订金出嚟!但文尼突然攞出一包毒品畀关超用嚟换钱还债。件事看似完结,不过文尼竟然又被大口泰手下捉走!究竟要自保定救人?关超食一啖手卷烟,作出咗最终决定!

呢套电影系第 4 届首部剧情电影计划嘅大专组得奖项目,喺今届金像奖获得 7 项提名,包括:最佳男主角、最佳摄影、最佳剪接、最佳美术指导、最佳服装造型设计、最佳动作设计同新晋导演。

* 林家栋凭呢套电影同《智齿》获得两个最佳男主角提名


《杀出个黄昏》
导演:高子彬
主演:谢贤、冯宝宝、林雪及钟雪莹
预告:https://www.youtube.com/watch?v=FMYsSHRl_M4

故事讲咩:田立秋 (谢贤饰演)、蔡凤 (冯宝宝饰演)、叶一丛 (林雪饰演) 喺 60年代曾系令人闻风丧胆嘅杀手三人组,无奈时代蜕变,亦敌不过年纪,三个人只好除低件战衣,重过平凡生活,然而步入黄昏之年,就被社会标签咗做「冇用」。一晚,电台播出一首叫〈青春之歌〉嘅点唱歌,令渠哋三个重燃一团火,之后仲重聚,一齐「重出江湖」。不过重组后嘅目标竟然系一班有病又孤独嘅老人⋯⋯

呢套电影嘅特别之处系,主角再唔系围绕住年轻人,而系一班上咗年纪嘅人,而且亦令「四哥」谢贤第一次提名金像奖最佳男主角!另外,呢度又要再提起林家栋呢个名,因为渠虽然喺戏中冇演出,但渠其实系呢套电影嘅监制兼其中一个编剧。

而喺今届金像奖就获得 5 项提名,包括:最佳编剧、最佳男主角、最佳男配角、最佳女配角及最佳新演员。

* 钟雪莹凭呢套电影同时获得最佳女配角及最佳新演员提名。


《一秒拳王》
导演:赵善恒
主演:周国贤、查朗桑提纳托古 (Chanon Santinatornkul)、林明祯、赵善恒、卢海鹏、袁富华、张建声及熊倬乐
预告:https://www.youtube.com/watch?v=DmWENYkUxRY
主题曲:〈时间的初衷〉(主唱:周国贤 & 恒仔@ToNick)
https://www.youtube.com/watch?v=Tk3zzF648RE

故事讲咩:废中周天仁 (周国贤饰演) 成日都喺酒吧避债度日,连个仔 (熊倬乐饰演) 都对渠毫无期望。不过因为渠有一秒预知嘅超能力,之后竟然被发掘去做拳手!从未认真看待自己嘅天仁,决定运用超能力,喺擂台上搵返失落已久嘅人生初衷,为自己好好活一次。

喺今届金像奖获得 4 项提名,包括:最佳编剧、最佳动作设计、最佳原创电影歌曲及新晋导演。

《拆弹专家 2》
导演:邱礼涛
主演:刘德华、刘青云及倪妮
预告:https://www.youtube.com/watch?v=WBbpjsEi8xk

故事讲咩:香港发生连环爆炸案,令全城人心惶惶。前拆弹专家潘乘风 (刘德华饰演) 喺案发现场昏迷咗,被警方列为头号嫌疑犯,怀疑渠同邪恶组织「复生会」有密切联系。而潘乘风醒返后,面对警方一连串嘅盘问同即将来临嘅牢狱之灾,决定逃走并亲自查明真相⋯⋯

喺今届金像奖获得 4 项提名,包括:最佳剪接、最佳动作设计、最佳音响效果及最佳视觉效果。

《第一炉香》
导演:许鞍华
主演:马思纯、俞飞鸿及彭于晏
预告:https://www.youtube.com/watch?v=HLR5Ld1fAyg

故事讲咩:上海大学生葛薇龙 (马思纯饰演) 嚟香港读书,投靠咗姑妈梁太太 (俞飞鸿饰)。点知梁太太就利用渠做饵诱去吸引男人,令葛薇龙渐渐沉迷喺纸醉金迷嘅世界里面。后来渠遇到花花公子乔琪乔 (彭于晏饰演) ,仲被对方吸引。为咗继续过上流生活,渠不惜出卖埋自己嘅灵魂,费尽心机嫁咗畀乔琪乔,最终令自己沦为梁太太同乔琪乔嘅敛财工具。

呢套电影改编自张爱玲嘅成名作之一,1943 年出版嘅中篇小说《沉香屑·第一炉香》。喺今届金像奖获得 4 项提名,包括:最佳摄影、最佳美术指导、最佳服装造型设计以及最佳原创电影音乐。

《夺冠》
导演:陈可辛
主演:巩俐及黄渤
预告:https://www.youtube.com/watch?v=9v3EAnNitak

故事讲咩:以传奇中国女排主教练郎平 (由巩俐饰演) 嘅故事为主线,讲述由 1981 至 2016 年嘅中国女排喺国际体坛上点样不断创造佳绩。

喺今届金像奖获得 3 项提名,包括:最佳导演、最佳女主角同最佳女配角。

《长津湖》
导演:陈凯歌、徐克、林超贤
主演:吴京及易烊千玺
故事讲咩:以韩战时嘅「长津湖战役」为原型改编嘅电影。

喺今届金像奖获得 3 项提名,包括:最佳剪接、最佳音响效果及最佳视觉效果 。

《除暴》
导演:刘浩良
主演:王千源、吴彦祖、春夏及卫诗雅
故事讲咩:1990 年代,刑警钟诚 (王千源饰演) 受命追捕由悍匪张隼 (吴彦祖饰演) 率领嘅犯罪集团「老鹰帮」。张隼集团喺多个地方都有作案,罪行累累,仲挑衅警方,态度十分嚣张。最终,经过 10 年嘅不懈努力,警方最终将张隼一团人捉拿归案。

电影改编自中国嘅张君案,喺今届金像奖获得 2 项提名,包括:最佳女配角及新晋导演。

《好好拍电影》
导演:文念中
预告:https://www.youtube.com/watch?v=v3pWbNS9_7k

故事讲咩:本身系电影美指嘅文念中用咗 4 年时间拍摄,记录唯一一位六次夺得金像奖最佳导演嘅许鞍华导演,喺电影内外嘅面貌。以影坛一众重量级人物嘅访问,以及许导演嘅多年创作贯穿渠嘅人生。

电影喺今届金像奖获得 2 项提名,包括最佳导演及新晋导演。

《马达‧莲娜》
导演:陈雅莉
主演:张继聪及周秀娜
预告:https://www.youtube.com/watch?v=iosUwSuKiyI&t=1s

故事讲咩:失婚又不善辞令嘅马达 (张继聪饰演) 因为受失眠困扰,去咗做夜间的士司机,有日遇上由外地去到澳门做外劳嘅陪酒女郎莲娜 (周秀娜饰演)。莲娜嘅出现令马达嘅生活多咗一点色彩,亦令马达开始以为自己可以摆脱失婚嘅伤痛。莲娜亦都知马达爱上渠,只系渠背后埋藏咗一段未能够释怀嘅过去⋯⋯呢个系两个于澳门浮沉,各有过去嘅陌生人相遇,相爱,相知嘅故事。

呢套电影系《金马创投会议》入围作品。而全套电影都喺澳门取景,并获澳门特别行政区政府文化局资助。喺今届金像奖获得最佳女主角 1 项提名。

《真‧三国无双》
导演:周显扬
主演:古天乐、王凯、杨佑宁、林雪及张建声;韩庚特别演出
故事讲咩:东汉末年,民间爆发咗黄巾起义,刘备 (杨佑宁饰演) 带住关羽 (韩庚饰演) 同张飞 (张建声饰演) 将其平定,但董卓 (林雪饰演) 竟然趁机霸占朝野,仲引发新一轮嘅动荡。

改编自日本光荣特库摩嘅同名电子游戏,亦已获对方正式授权。喺今届金像奖获得最佳服装造型设计 1 项提名。

《狂舞派 3》
导演:黄修平
主演:颜卓灵、蔡瀚亿、杨乐文、刘敬雯及霍嘉豪(Heyo)
预告:https://www.youtube.com/watch?v=Ndl0hPu3u08
主题曲:〈欢迎嚟到呢座城市〉(主唱:霍嘉豪、阿弗、刘敬雯、Jan Curious、Kids Choir-戴天信、戴菲然、范芯尧、李宝瑜、庄冬晴)
https://www.youtube.com/watch?v=gwrRmAuWzQw

故事讲咩:龙城工厦区原本系个工业区,近呢廿年因为租金平,吸引咗唔少各个范畴嘅创作人进驻,渠哋畀人称为 KIDA (Kowloon Industrial District Artists),包括近年上映嘅跳舞电影《狂舞派》及《狂舞派 2》嘅好多幕前幕后,都以龙城为基地。然而工厦近年不断急剧加租,仲出现各种频繁严厉嘅巡查,背后其实就系地产商作祟,要将龙城转型成商贸区。某日,呢班创作人收到个工作邀请,但系明眼人都知系一项帮地产商涂脂抹粉嘅工程,渠哋当中有人觉得可以借此令更多人认识,亦有人反对⋯⋯

呢套系 2013 年上映嘅《狂舞派》续集,不过并冇延续上集嘅热血追梦故事,仲将《狂舞派 2》放入电影中,成为咗「戏中戏」,亦系入围电影中唯一一套以广东话口语做字幕。

喺今届金像奖获得最佳原创电影歌曲 1 项提名。

亚洲华语电影
今届金像奖会有 3 套台湾电影一齐竞逐最佳亚洲华语电影呢个奖项。


《月老》
导演:九把刀
主演:柯震东、王净、宋芸桦及马志翔
预告:https://www.youtube.com/watch?v=gEqXgmrgGgM

故事讲咩:被雷击而死嘅阿纶 (柯震东饰演) 去到阴间,失去生前嘅所有记忆外,亦需要选择自己系现阶段就投胎转世 (不过有机会变成蜗牛) 定系担任神职累积阴德先再转世为人。最后渠拣咗做月老新鲜人,同冲动嘅粉红女 Pinky (王净饰演) 成为拍档,上返人间执行任务。当阿纶遇上拖住狗狗阿鲁嘅主人小咪 (宋芸桦饰演) ,前世嘅记忆就返晒嚟—记起小咪系自己嘅生前挚爱;渠打算帮阳间嘅小咪搵到新嘅姻缘,但每一条绑喺小咪手上嘅红线竟然都被烧毁⋯⋯同时,由阴间走佬上人间嘅鬼头成 (马志翔饰演) ,搵返 500 年前背叛兼杀死自己嘅马贼兄弟复仇。阿纶仲为小咪啲红线绑唔到而开心,殊不知鬼头成已经将小咪当做下一个要毁灭嘅目标⋯⋯

呢套电影系改编自台湾作家九把刀嘅同名小说,有睇过 2011 年上映嘅 《那些年,我们一起追的女孩》,应该会对九把刀同柯震东呢个组合好熟悉,而今次亦系渠哋第 3 次合作。

《美国女孩》
导演:阮凤仪
主演:林嘉欣、庄凯勋、方郁婷及林品彤
预告:https://www.youtube.com/watch?v=VR9RtdYZcMo

故事讲咩:2003 年,移民美国 5 年嘅莉莉 (林嘉欣饰演),因为患上乳癌,所以带埋芳仪 (方郁婷饰演) 同芳安 (林品彤饰演) 两个女由洛杉矶返去台湾新店,同疏离多年嘅老公宗辉 (庄凯勋饰演) 团聚。不过由于中文唔好,妹妹芳安喺班上嘅成绩严重落后,被同学叫渠做「美国女孩」,而且对妈妈嘅病亦非常无力,只系想返美国;而家姐芳仪亦有各种叛逆行为,令随时担心癌症会恶化嘅莉莉不能谅解。喺各种因素影响下,莉莉同芳仪不断发生冲突,仲喺芳安因为 SARS 被送去医院隔离嗰阵到顶⋯⋯但系呢场意外嘅疫情,令莉莉一家逼住要面对彼此嘅心结,亦成为修补关系嘅契机。

电影改编自导演阮凤仪嘅童年际遇,系渠嘅第一套长篇电影,亦系一套「半自传」。而且饰演妈妈莉莉嘅林嘉欣亦同饰演大女芳仪嘅方郁婷凭住呢套电影同时入围金马奖嘅最佳女主角!


《消失的情人节》
导演:陈玉勋
主演:刘冠廷及李霈瑜
预告:https://www.youtube.com/watch?v=dNPVoJpL-MU

故事讲咩:喺邮局做嘢嘅晓淇 (李霈瑜饰演) 性格急,而且行事俐落同反应敏捷,不过偏偏等唔到爱情,30 岁都依然单身。有日开始,渠发觉不论阴晴,有个慢半拍嘅「寄信男」(刘冠廷饰演) 每日都会嚟寄一封神秘嘅信。喺情人节前夕,渠就被一个「阳光男」搭讪,仲成功约到渠,以为可以拍拖啦,点知瞓醒一觉,渠期待嘅情人节竟然消失咗!而渠仲要断片,对嗰日发生啲乜都冇印象,甚至连「寄信男」同「阳光男」都唔见埋!于是,渠决定去踏上搵返呢日真相嘅旅程⋯⋯

呢套电影由导演陈玉勋自编自导,喺 2020 年第 57 届金马奖获得 11 项提名,更加获得当中 5 个奖项,包括最佳剧情长片、最佳导演、最佳原着剧本、最佳剪辑同最佳视觉效果!

金像奖主席尔冬升喺接受媒体访问时表示,目前仍然决定喺 4 月 17 号香港文化中心举行颁奖礼。而小薯仔喺度都希望今届颁奖礼可以如期顺利举行,等关注呢项香港电影界盛事嘅观众都可以透过指定平台睇转播,见证各个得奖单位诞生~
(24/3/2022 更新:金像奖大会宣布颁奖礼将喺 7 月 17 日九龙湾国际展贸中心汇星举行)

以上嘅入围电影中,《怒火》、《智齿》、《浊水漂流》、《一秒拳王》、《除暴》、《折弹专家2》、《狂舞派3》,《月老》及《梅艳芳》都已经串流上咗香港 Disney+!大家可以喺金像奖颁奖礼前重温。
未有 Disney+ 睇唔到?立即订阅:http://disneyplus.bn5x.net/e42ooX


撰文:小薯仔
资料来源:维基百科、香港电影金像奖网页及网上资料
照片来源:网上图片;《杀出个黄昏》、《一秒拳王》、《月老》Facebook


延伸阅读:
哥哥张国荣5套电影推介 当中有你钟情嘅作品吗?
https://timable.com/blog/2163967

【金像奖2022】金像奖4位入围最佳男主角 大前辈同新人边位会脱颖而出?
https://timable.com/blog/2174406

【金像奖2022】金像奖5位入围最佳女主角 前辈新人各有优势
https://timable.com/blog/2163068

【金像奖2022】金像奖5位入围最佳男配角 前辈新人各有千秋
https://timable.com/blog/2156900

【金像奖2022】金像奖5位入围最佳女配角 前辈新人竞争激烈
https://timable.com/blog/2150199


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app