世界各地嘅歌手,除咗透过音乐、歌曲同现场表演去传达渠哋想听众 / 粉丝收到嘅讯息外,喺音乐录像 (Music Video,简称 MV) 上亦会花心机去构思。而 MV 嘅种类有好多,亦冇话有时长嘅限制,所有影片创作嘅形式都包括在内:可以系一个由真人演出嘅故事,可以系用动画形式或者系用图像拼凑,可以系记录有关演唱者日常嘅片段,甚至可以系简单地用音乐配上歌词,都己经系一个MV。有啲以跳舞快歌为主嘅歌手亦会另外拍一个版本系将嗰首歌曲嘅编舞跳晒出嚟。

咁近代嘅 MV 又系点出现㗎呢?普遍都认为系英国嘅 QUEEN 乐队喺 1975 年推出〈Bohemian Rhapsody〉呢首歌嗰阵所拍嘅影片,突破咗当年嘅框架,系 MV 时代开始嘅象征;去到 1984 年,Michael Jackson 出咗〈Thriller〉嘅 MV,呢个系史上第一个有故事性嘅 MV,渠亦深深影响咗往后 MV 嘅内容,同年 Michael Jackson 亦出咗《The Making of Thriller》,系第一条讲 MV 幕后制作嘅片。所以大家可以见到而家多数 MV 都会用一个故事嚟贯穿成段片,有啲歌手亦会出埋 MV 拍摄花絮。

返返嚟香港:早期歌手嘅 MV 通常会由电视台拍摄,再喺电视台播放,甚至会整成一啲叫音乐特辑嘅节目,亦未有咁着重内容同画面;第二个渠道可以畀观众接触到 MV 嘅,就系卡拉OK。大家唱 K 嗰阵见到有歌手出现嗰类 MV,其实已经系「进化版」。

随住互联网嘅发达,近年香港嘅歌手亦同其他地方一样,除咗派歌上电台,亦将MV变成歌曲嘅主要宣传渠道。唱片公司拍完就上传去歌手嘅 YouTube 频道,畀粉丝同观众可以不受任何限制咁睇,甚至会用埋 4K 拍摄,令画质更好。而人气旺盛嘅 MIRROR 亦将呢样嘢发挥到极致,每逢成员个人或者系团体推出新歌,都会令粉丝们期待该首歌曲嘅 MV,当然亦会不断睇嗰个 MV 以示支持。

事不宜迟,即刻嚟睇下小薯仔精选嘅 MIRROR 团体同成员个人单曲 MV 啦:

1. 先放团体,再以成员英文名之顺序排列
2. 拣选嘅 MV 都系小薯仔主观上钟意嘅,多唔多观看次数或者系咪新歌并唔喺考虑范围


MIRROR 团体歌曲
虽然 MIRROR 出道已经系踏入第 4 年,但系推出嘅团体歌曲数量并唔多。小薯仔就几钟意以下两首:



〈WARRIOR〉
https://www.youtube.com/watch?v=YI4qsJhZtwA
全个 MV 都只系以穿着黑色同白色服装成员嘅镜头同跳舞部分组成,可以话算系构成比较简单嘅一个 MV。而呢个应该都系 MIRROR 嘅歌曲 MV 里面,其中一个可以表现出渠哋有气势一面嘅 MV。


〈12〉
https://www.youtube.com/watch?v=b2qXJwIW1pE
作为呢个团体第一首圣诞歌,个 MV 都几有圣诞气氛嘅。以喺学校发生嘅圣诞树上星星失窃事件为主轴,再穿插成员唱歌嘅画面,系近年喺唔同歌手嘅 MV 中都几常见嘅形式。虽然圣诞节已经过咗几个月,今年嘅圣诞节又有排先到,不过都可以睇下,毕竟睇 MV 系冇分时间嘅~

成员个人歌曲


Alton 王智德 x Anson Kong 江𤒹生 -〈REBOUND〉
https://www.youtube.com/watch?v=O5fXXbjT_Mc
印象中,近年香港歌手嘅 MV 比较少搵一大班艺人一齐客串同一个 MV,不过继成员 Anson Lo 之后,Alton 同 Anson Kong 呢首噚日先推出嘅新歌,都请嚟咗 C All Star 嘅 On 仔、乐队 ONE PROMISE 同 Nowhere Boys,仲有梁祖尧、洪嘉豪等,加上 MIRROR 队长 Lokman 同成员 Frankie 去酒店「开 Party」。

根据两位成员所讲,为咗配合歌曲嘅气氛,所以 MV 以渠哋参与 Party 后醉酒断片为主去呈现出嚟,又间唔时有超级跑车穿插于画面,加上一大班人玩得尽兴嘅场面,算系近年香港歌手中比较少见嘅「吵吵闹闹」欢乐式 MV~

(上:〈特登〉;下:〈EGO〉)

Anson Kong 江𤒹生 -〈特登〉
MV 版本:https://www.youtube.com/watch?v=QKm8znqIM4U
微电影版本:https://www.youtube.com/watch?v=7xFuxVPNyIo
跳舞版本:https://www.youtube.com/watch?v=BeH-OaM2BQc
一开始提到所有影片创作嘅形式都可以构成一个 MV,而 Anson Kong 呢首喺 2020 年推出嘅单曲,除咗普通故事形式 MV 外,亦有跳舞版本嘅,甚至用呢首歌拍咗一个微电影出嚟!

微电影形式嘅歌曲 MV ,未必同原来版本嘅 MV 内容相关,可以系一个新嘅故事。不过呢首歌嘅微电影版本,其实就系原本故事情节嘅延伸发展,令看者感受到嘅嘢再多啲。

Anson Lo 卢瀚霆 -〈EGO〉
MV 版本:https://www.youtube.com/watch?v=VnnoAz6taAM
跳舞版本:https://www.youtube.com/watch?v=gMkAc5TMKY4
Anson Lo 呢几年推出咗唔少个人作品,大多数都系跳唱歌曲,所以有普通 MV 嘅版本之余,亦有跳舞版本嘅。

虽然渠最近新出咗一首〈Mr. Stranger〉。但系如果讲到 MV,小薯仔就比较中意〈EGO〉。呢个 MV 表面上好似冇一个好完整嘅故事,只系以一啲同歌词 / 歌曲连系到嘅画面同跳舞场面构成,不过其实呢啲画面连同歌词己经带出到歌者想表达嘅嘢,算系个简单易明嘅 MV。


Edan 吕爵安 -〈E先生连环不幸事件〉
MV 版本:https://www.youtube.com/watch?v=7FPL4DRizgk
钢琴版本: https://www.youtube.com/watch?v=UUhkNZYwnsc
大部分情歌嘅 MV,都会以故事形式呈现歌曲内容,而Edan 推出嘅几首个人歌曲都系情歌,所以啲 MV 都系用故事嚟串连。

呢首 2021 年推出嘅歌,虽然 MV 内容系以三角恋为主,不过有个特别之处系歌曲钢琴独奏嗰部份,MV 中都有配合返,出现 Edan 自己弹钢琴嘅场面。

上面写嘅成员个人 MV 另一个版本都系出跳舞版,但系 Edan 呢首出嘅另一个 MV,就系渠弹全首歌嘅钢琴版本。


Ian 陈卓贤 -〈留一天与你喘息〉
https://www.youtube.com/watch?v=uuV8wZ_P8r4
Ian 推出嘅歌曲都比较偏向抒情或者系 R&B 风格,所以渠嘅 MV 都比较多用故事形式。

点解小薯仔会拣呢个 MV 呢?主要系几钟意 MV 嘅内容同设定,讲述一对喺精神病院嘅恋人结伴逃离嘅故事。画面配合返歌词,再加上而家嘅大环境下,畀到人一种舒服嘅感觉,所以都几推介大家睇嚟放松下。


Jer 柳应廷 -〈人类群星闪耀时〉
https://www.youtube.com/watch?v=cWQ99uzuqJ8
Jer 出嘅歌都钟意用一个系列嚟串连埋,而呢首歌就属于「重生三部曲」嘅第 3 首。呢个 MV 虽然睇落好似系一个单独嘅故事,但其实里面都有加插头两部曲—〈狂人日记〉同〈砂之器〉嘅 MV 人物,交代返渠哋嘅后续发展,同呢两首歌做返个呼应。最特别系,呢个系第 1 个 MV 运用 XR 技术 (即系 Extended Reality,虚实混合)!


(上:〈半〉;下:〈Dear My Friend,〉)

Jeremy 李骏杰 -〈半〉
https://www.youtube.com/watch?v=s2VfMoHgjA4
虽然系 Jeremy 第 1 首嘅个人单曲,不过呢个 MV 就系成员甚至团体中,比较大胆嘅。MV 中搵咗 Fish 廖子妤,做 Jeremy 嘅「另一半」,当中除咗穿插 Jeremy 跳糅合 Urban Dance 同现代舞嘅舞蹈部份,跟随住故事情节发展,甚至有杀人见埋血、发生亲密关系等嘅场面,完全带畀观众视觉上嘅冲击。

姜涛 -〈Dear My Friend,〉
https://www.youtube.com/watch?v=S3cHTNEsCcY
姜涛作为最早推出个人单曲嘅 MIRROR 成员,作品其实都唔少。而呢首攞咗「我最喜爱歌曲」嘅,背景相信都唔使多作介绍。MV 里面嘅场景同情节,都同姜涛同朋友所发生过嘅事有关。就算未经历过相关情况,了解咗歌曲背后嘅意义,再睇埋个 MV,应该都会感受到当中嘅情感。

MIRROR 团体同有出个人歌曲嘅成员,每首歌再加有啲唔同嘅版本,合计有 65 个 MV。因为篇幅有限,所以恕小薯仔唔能够每个都列出。想睇晒咁多个 MV,可以去返 MIRROR 嘅 YouTube 频道:https://www.youtube.com/playlist?list=PLgFYQFfidPfuimRBpEG1PTUeUbIPW8Ulb

撰文:小薯仔
照片来源:MIRROR YouTube 上传之各 MV 截图;MIRROR Instagram;网上图片


延伸阅读:
【睇YouTube】MIRROR成员嘅YouTube频道有咩睇?
https://timable.com//zh-hk/blog/2140181

【睇电视2022】ViuTV 篮球剧《季前赛》睇MIRROR同ERROR喺球场上挥洒汗水!
https://timable.com//zh-hk/blog/2128581

【睇电视2022】ViuTV 新运动剧《i.SWIM》继续青春热血!
https://timable.com/zh-hk/blog/2126092


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app