香港市面上售卖嘅蔬菜,虽然大部分都系由其他地方输入,不过其实本地嘅农夫一直都有继续种紧唔同品种嘅蔬菜㗎!近年都越嚟越多人加入本地耕作嘅行列,而本地有机农产品又越嚟越多种类,同时当然唔少得多咗各种唔同嘅农墟可以畀呢班农夫一个新嘅销售渠道啦~

而且根据蔬菜统营处嘅资讯,本地种植除咗因为运送距离比较短,而令市民可以买到最新鲜嘅菜之外,呢种短途运输方式更加可以帮助减低碳足迹,对可持续发展同地球环境都有帮助。

小薯仔今次就拣咗几个本地农场,如果大家对渠哋嘅产品有兴趣,可以直接搵渠哋查询:



俏姐农场
https://www.facebook.com/ciuze
俏姐嘅农场设喺大埔林村,除咗种植肉姜、粉葛、西洋菜、油麦菜、生菜同椰菜等唔同嘅农作物外,仲会将呢啲自家种植嘅作物制成手工食品,好似系陈皮柠檬炖冰糖同姜黄粉咁。

新鲜嘅农产品可以联络俏姐交收,如果想亲自落田摘菜,亦可以联络渠预约时间。



欧罗有机农场
https://www.facebook.com/aulawfarm
欧罗呢个种植有机菜嘅农场,位于元朗锦田。渠哋所种植嘅蔬果包括:生菜、大白菜、油麦菜、红菜头、西兰花、韮菜、车厘茄同杨桃等,另外仲有竹蔗包~

大家可以喺农墟或者系网站单次购买渠哋嘅农产品,如果需要长期订购,亦可以拣月购套餐,每星期一次喺指定地点同时间自取,或者由渠哋送货。
(不过因为疫情严重,送货服务会喺 14/3 – 1/4 期间暂停,之后再视乎情况决定)



麦棠农场
https://www.facebook.com/honeysfarmhk
呢个系 2 位年轻人位于元朗锦上路嘅自家农场。渠哋奉行以尊重在地生命嘅有机方式去生产本地新鲜蔬菜嘅模式,顺应植物生长、时令,而且用清水洗涤啲菜就可以煮食。有意大利生菜、罗马生菜苗、芫茜、皇帝菜同菠菜苗等。

想买渠哋嘅出品,可以 WhatsApp 渠哋联络交收或者落田自己摘。



华记有机农场
https://www.facebook.com/WahKeeOrganicFarm
同样系位于元朗锦上路嘅华记有机农场,系全港 133 个经严格检验各方面后先可以获「有机认证农场」嘅其中一个。每一样蔬菜都系新鲜即日采摘㗎!有椰菜花、车厘茄、生菜、紫椰菜、粟米等嘅蔬菜~

如果想购买,可以用电话落单 / 逢星期三去到中环天星码头嘅农墟,又或者亲身去到农田采摘,详情可以联络渠哋查询。


高原农场
https://www.facebook.com/hkmountainfarm
位于大帽山嘅高原农场,系家庭式嘅小型农场,用自然农法同有机耕作方式去种植时令蔬果,最近就有白菜仔、菜心、生菜同油麦菜,仲有白萝卜。渠哋亦会不定期推出包含唔同菜款嘅菜包以供选购。

不过受前排连续几日大雨嘅影响,虽然啲菜苗继续生长紧,但系就赶唔上收割期。所以呢段时间会先暂停供菜。

撰文:小薯仔
照片来源:各农场 Facebook


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app