因为一个 20 年都冇变过嘅电话号码,再次将台湾艺人大 S 徐熙媛同韩国元祖一代团之一CLON (酷龙) 成员具俊晔拉返埋一齐,甚至令渠哋拉埋天窗。喺好多年轻人问紧「who?」嘅同时,其实亦令唔少有一定年资嘅粉丝回想返当年喺资讯 / 互联网未咁发达嗰阵,追星嘅日子。

唔知以下小薯仔介绍嘅呢几个团体,大家又有冇追过或者对渠哋有所认识呢?


CLON (클론 / 酷龙)
成员:具俊晔 (구준엽)、姜元来 (강원래)
出道年份:1996 年
代表作:
〈빙빙빙 (Bing Bing Bing)〉
https://www.youtube.com/watch?v=NvxxChFqsaw

〈Kungtari Shabara〉
https://www.youtube.com/watch?v=6SrNsoDomho
两位成员本身系高中同班同学,亦都喺渠哋学校同学校附近区域出晒名非常钟意跳舞。毕业后渠两个就参加咗个跳舞比赛,被李秀满发掘,做咗当时得令嘅歌手玄振英嘅舞蹈员,变咗「玄振英与 Wawa」 1 期成员,不过之后因为要服兵役,所以好快就退出咗。


喺 1996 年就被天王级嘅音乐制作人金昌完发掘,于是就组成咗「CLON」呢个双人组合,主打 Hip-Hop 舞曲同饶舌曲风。第一只碟嘅主打歌〈Kungtari Shabara〉一推出就非常受欢迎,仲喺各个音乐节目攞咗 12 个 1 位,最后以新人身份攞埋首尔歌谣大赏嘅大赏 (即系全个颁奖礼最大嘅奖)!而 1997 年推出嘅第二只碟,里面两首主打歌〈빙빙빙 (Bing Bing Bing)〉同〈도시탈출 (都市逃出 / 逃离城市)〉除咗红遍全个韩国,连喺台湾、香港、中国同其他亚洲国家都有好高人气,歌曲亦被台湾歌手徐怀钰同香港歌手杜德伟改编做中文版本~之后更加喺台湾同北京举行演唱会!


不过喺 2000 年 11 月,成员姜元来遇到车祸,造成下半身瘫痪,令 CLON 嘅演艺事业要暂停。而呢段时间具俊晔都一直陪喺姜元来身边,并且讲明唔会单飞发展!直到 2005 年,渠哋先再推出新碟~


H.O.T. (High-five Of Teenagers)
成员:文熙俊 (문희준)、张佑赫 (장우혁)、Tony An (安胜浩 / 안승호)、Kangta (安七炫 / 안칠현)、李在元 (이재원)
出道年份:1996 年
代表作:
〈전사의 후예 (폭력시대) (战士的后裔)〉
https://www.youtube.com/watch?v=631bfFu7vaU

〈Candy〉
https://www.youtube.com/watch?v=K2N3eDW5kUc
如果话上面 CLON 已经好红,咁 H.O.T. 作为当时啱啱创立嘅 SM 娱乐所推出嘅第一组男团,人气强劲程度绝对有过之而无不及,主宰咗大众文化,令当时嘅青少年疯狂迷恋,出碟、周边产品、演唱会门票每次一出都好快被抢购一空。「H.O.T. 症候群」轰动韩国社会之余,甚至奠定埋现今韩国偶像产业嘅发展方向,包括偶像文化、应援文化等。


渠哋喺 1996 年 9 月出道之后,第一只碟嘅主打歌〈전사의 후예 (폭력시대) (战士的后裔)〉用咗非常短嘅时间就获得大量粉丝嘅支持,更有一段长时间高锯各个音乐节目排行榜嘅榜首!后续曲〈Candy〉嘅可爱形象,为渠哋带嚟咗更多嘅少女粉丝~而之后推出嘅歌曲同专辑都令人气有增无减,甚至喺其他地方都有唔少粉丝,所以令渠哋喺 2001 年解散之前,一直都系韩国男团嘅顶峰!

而渠哋推出嘅歌曲题材,除咗最大路嘅爱情,仲包括唔少社会议题,好似系反对校园暴力同呼吁老师唔好体罚学生,歌词亦非常紧扣主题,被视为系当时青少年嘅「代言人」,仲有服装同发型发色,都为当时仲系偏向保守嘅韩国社会,带嚟非常大嘅冲击。

喺 2018 年,韩国节目《无限挑战》特辑就成功邀请到渠哋合体演出,喺第一日开放观众申请入场嗰阵,就超过 10 万人作出申请,令官方网站死 server!呢个特辑仲令节目收视率比起同时段所有节目都高㖭!


水晶男孩 (젝스키스 / SECHSKIES)
成员:殷志源 (은지원)、李宰镇 (이재진)、金在德 (김재덕)、张水院 (장수원)、姜成勋 (강성훈,现已退团)、高志镕 (고지용,现已退团)
出道年份:1997 年
代表作:
〈사나이 가는 길(폼생폼사)男儿之路(品生品死)〉
https://www.youtube.com/watch?v=4v4PFanJj_U

〈Couple〉
https://www.youtube.com/watch?v=42GaJk4YNLQ
水晶男孩系当年 SM 娱乐嘅竞争对手 DSP Media ,为咗抗衡已经非常成功嘅 H.O.T. 而打造出嚟嘅组合。SECHSKIES 其实系德文,解做 6 粒水晶,意指系可以左右命运,而渠哋都非常成功地同 H.O.T. 一齐被韩国媒体并称为 90 年代后期韩国乐坛两大山脉。

1997 年出道后嘅第一首主打歌〈학원별곡 (学园别曲)〉系批判当时教育制度,而同名专辑推出咗之后都获得极大回响,令渠哋人气急速上升,成为咗各种广告商嘅新宠,亦理所当然地变成咗当时 H.O.T. 嘅最大对手。喺 1998 年推出咗〈Couple〉呢首歌,仲唱到街知巷闻~甚至喺呢年嘅「首尔歌谣大赏」,两个团体仲一齐获得「年度大赏」呢个最大奖项!


然而喺 2000 年 5 月,仲喺事业巅峰嘅渠哋突然喺酒店召开记者会,宣布解散。直到 2016 年,韩国节目《无限挑战》特辑 (冇错又系《无限挑战》),邀请渠哋担任主角,先再次合体出现喺大众面前 (除咗已经退出咗娱乐圈嘅高志镕),亦因为呢个节目举办嘅游击演唱会非常成功,所以令渠哋正式重新开始团体活动。不过到 2019 年,因为姜成勋宣布退出团体,水晶男孩就正式变咗 4 人组合。


SHINHWA (신화/ 神话)
成员:Eric (文晸赫 / 문정혁)、李玟雨 (이민우)、金烔完 (김동완)、申彗星 (신혜성)、JunJin (朴忠栽 / 박충재)、Andy (李先镐 / 이선호)
出道年份:1998 年
代表作:
〈T.O.P. (Twinkling of paradise)〉
https://www.youtube.com/watch?v=tosQj7d58SU

〈Perfect man〉
https://www.youtube.com/watch?v=Lxe9yXVa24Q
神话呢个团体,同渠哋个名一样,都系神话嚟!1998 年 3 月出道之后,到呢一刻,成员嘅构成冇变过,人数冇加减,亦冇解散同冇暂停过团队活动,系韩国史上最长寿嘅偶像组合!渠哋亦以呢样嘢登上咗健力士世界纪录!

同时每次团体合约完咗,都系将 6 位成员嘅团体合约一齐转去新公司,渠哋甚至系 K-pop 史上,第一队自己成立公司去管理团体合约嘅组合㖭!


虽然出道时间比上面 3 个组合迟,但系渠哋嘅人气其实都唔差㗎!呢 24 年间亦有好多脍炙人口嘅歌曲,大家啲歌都好经常出现喺唔同嘅综艺节目中,而渠哋喺节目上发挥出嘅出色综艺感,都系男团中数一数二嘅~

话就话系第一代男团,不过喺成员全部服完兵役嘅 2012 年,再次完整体活动期间播出嘅团体综艺节目《神话放送》就吸引咗唔少年纪比较轻嘅粉丝,而且渠哋由嗰阵开始都有继续出团体新歌,都令到唔少人可以透过音乐接触返渠哋。


撰文:小薯仔
资料来源:维基百科、Namu Wiki及网上资料
照片来源:newszeen @tistory 网站;길거리 인문학도 Naver Post 网站 / Douban;eramorrgetta @tistory网站;DJ Koo、H.O.T.、Tony An Instagram;SECHSKIES、SHINHWA Facebook


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app