YouTube 影片


近排令唔少观众都非常投入嘅其中一套大热韩剧《二十五,二十一》,除咗喺韩国收视不断创新高,喺 Netflix (特别系韩国) 更加系成日都喺排行榜嘅榜首!

故事就行青春爱情路线,男女主角金泰梨同南柱赫外型合衬之外,每一集嘅台词、运镜同一众演员嘅演技都非常精彩㗎!当中亦留下咗一幕幕经典场面,唔知大家又会唔会经常回想起呢?而韩国观光公社香港支社 (KTOHK) 就好贴心地为大家整合咗 5 个剧中经典场面嘅拍摄地点,等大家可以喺疫情过后飞去重温青涩主角们嘅心动时刻!


第一站:声音磨坊 (소리 방앗간)
地址:全罗北道全州市完山区西学 3 街 63 号西学洞艺术村 (전주시 완산구 서학 3 길 63 서학동 예술마을);全罗北道全州市完山区西学 3 街 85-3 (전주시 완산구 서학 3 길 85-3)
网站:http://www.seohakro.com/seohak-home/
由南柱赫饰演嘅男主角白易辰,剧中就喺一间叫 명진 책 대여점 嘅漫画店度做兼职,呢间舖头嘅原名就叫「소리 방앗간」,即系声音磨坊。喺剧集播出之后,即刻吸引咗唔少人去打卡!不过当然就见唔到白易辰呢位暖男啦~


声音磨坊其实系位于西学洞艺术村里面,艺术村嘅特色小店林立,包括由摄影师开设嘅摄影艺廊,仲有咖啡店、书店等嘅舖头,充满咗文艺气息!而且距离全洲韩屋村都唔太远,结束喺韩屋村嘅观光行程,不妨可以嚟呢度行下㗎!


第二站:寒碧窟 (한벽굴)
地址:全罗北道全州市完山区校洞山 7-2 (전주시 완산구 교동산 7-2)
虽然每集嘅结尾都系经典场面,但系第 2 集最后嘅几分钟,由金泰梨饰演嘅女主角罗希度,喺隧道口同被爸爸债主追数嘅白易辰讲嘅一番话,就成为咗剧中经典台词之一:「以后只有我同你两个一齐玩嗰阵,你可以背住渠哋觉得幸福。只有我同你一齐嘅时候,就偷偷地享受片刻嘅幸福啦。」

呢个咁经典嘅场面原来系喺全洲一个叫「寒碧窟」(한벽굴) 嘅地方拍摄。呢度系 1931 至 1981 年间,全罗线列车会通过嘅一条隧道,不过而家就变成咗全洲市民嘅散步热点。夏天嘅寒碧窟,就好似剧中场景呈现出嚟咁,绿意盎然;去到秋天就会有红黄相间嘅枫叶做点缀,真系可以讲话系唔同季节性有唔同景色!同声音磨坊一样,喺播出后都吸引咗唔少剧迷去到隧道口朝圣同打卡。


而寒碧窟附近仲有被指定为全罗北道第 15 号有形文化财产嘅寒碧堂 (한벽당),呢个系喺 1404 年由朝鲜王朝嘅开国元勋兼文臣—月塘崔湛先生,为自己所修建嘅别墅阁楼。因为位于僧岩山峭壁嘅旁边,所以周围嘅景色都好靚!喺寒碧堂俯瞰嘅云雾景色,更加被评为全洲八景之一㖭!


第三站:马罗尼矣公园 (마로니에공원)
地址:首尔特别市钟路区大学路104 (서울특별시 종로구 대학로 104)
网站:http://parks.seoul.go.kr
喺第 8 集嘅结尾,罗希度同网友「糯米糕」喺网上面倾咗 3 年偈,终于决定见面,于是双方就相约拎住黄玫瑰喺马罗尼矣公园见面。点知原来「糯米糕」嘅真正身份系由苞娜饰演,一直睇罗希度唔顺眼嘅高宥琳,渠发现一直以嚟同自己倾心事嘅网友竟然系罗希度嗰阵,吓到将手中嘅黄玫瑰塞畀旁边嘅白易辰,仲匿埋咗喺远处。因为咁,令罗希度误以为「糯米糕」就系白易辰,仲好霸气同渠讲「我要拥有你」㖭!


马罗尼矣公园系因为种咗好多马罗尼矣树而得名。呢个作为首尔市民文化艺术基地而设立嘅公园,过去曾经系首尔大学文、理、法学院嘅所在地,而家就变咗举办各种露天文化活动、雕塑展览嘅场地,仲汇聚咗文艺会馆等各种文化设施,令呢个年轻文化艺术之地散发出独特嘅文化气息。


第四站:三浦海水浴场 (삼포해수욕장)
地址:江原道高城郡竹旺面三浦里 (강원도 고성군 죽왕면 삼포리)
网站:http://sampobeach.co.kr/
喺第 10 集,白易辰拍摄紧罗希度同高宥琳嘅纪录片嗰阵,发现渠哋好想去从来都冇经历过嘅校外教学 (即系修学旅行),于是就带渠哋,同埋渠哋嘅同学—由李宙明饰演嘅池升琬以及由崔显旭饰演嘅文智雄一齐去海边旅行,制造回忆。


太梁高中 5 人帮去嘅海边,就系位于江原道高城郡嘅三浦海水浴场。高城郡位于东海岸嘅最北边,有好多着名嘅旅游胜地,例如系花津浦海水浴场同 HANI 薰衣草农场等。而三浦海水浴场就系唔少韩国人都推荐嘅度假胜地,水清沙幼,连韩国综艺节目《带轮子的家》都曾经喺呢度进行拍摄㗎!如果入住埋海边嘅酒店,更可以随时将迷人海景同醉人日落一览无遗!


最后一站:春川大桥 (춘천대교)
地址:江原道春川市槿花洞 (강원도 춘천시 근화동)
仲记唔记得喺第 9 集最后同第 10 集嘅开头,白易辰喺桥上面对罗希度嘅动人表白?相信嗰幕都令好多萤幕前嘅观众心动到系咁尖叫—「我爱紧妳呀罗希度!」、「无论妳做咩,展现出边种模样,我都爱原原本本嘅嗰个妳呀!」一句句直球式嘅告白,都令一众剧迷对住个萤幕疯狂大嗌「白易辰咁样『勾引』对方根本有罪呀!」

其实呢幕经典场面嘅拍摄地点,正正就系位于江原道嘅春川大桥。呢条大桥全长 1058 米,阔 25 米,连接槿花洞同中岛,亦可以通去暂定今年 5 月 5 日开幕,全球首个位于岛上嘅乐高乐园—春川 Legoland 嘅入口。

呢条大桥嘅设计好独特,中间部分有个巨型嘅圆形~桥上亦设有一条散步步道,唔少春川嘅市民都会喺上面一边散步一边欣赏两边美丽嘅江景,而夜晚大桥亮灯之后都好靚㗎!可以话春川大桥喺日头同夜晚有截然不同嘅魅力!


整理:小薯仔
资料由韩国观光公社香港支社 (KTOHK) 提供
照片来源:韩国观光公社香港支社 (KTOHK)、《二十五,二十一》剧照 / tvN


延伸阅读:
【抗疫2022】Netflix 近期韩剧推介 留喺屋企实有嘢睇!#2
https://timable.com//zh-hk/blog/2142722

【抗疫2022】Netflix 3月片单推介 留喺屋企实有嘢睇!
https://timable.com//zh-hk/blog/2140530

Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app