今届金像奖将会喺 7 月 17 日假九龙湾国际展质中心汇星举行,而所有奖项嘅提名名单都已经喺 2 月公布咗,入围最佳男配角就包括古天乐、林雪、冯皓扬、柯炜林同谢君豪 5 位演员。

一齐嚟睇下小薯仔整理嘅 5 位入围演员简介啦:


古天乐《梅艳芳》
演员 IG:https://www.instagram.com/kootinlok_louis
喺电视台拍剧出身嘅古天乐,千禧年头嘅《寻秦记》时不时都有唔少人提起,而拍完呢套剧之后,渠嘅演艺事业重心就转移去电影方面,产量亦非常多。喺 2008 年凭《门徒》提名金像奖最佳男配角之后,今次系相隔 14 年后第 2 次获得呢个奖项嘅提名。

喺《梅艳芳》呢套戏里面,渠饰演以刘培基为原型嘅时装设计师 Eddie,系梅艳芳嘅形象设计师、恩师兼挚友。好多观众睇完都觉得渠呈现出嚟嘅造型神态同刘培基本人都算几神似,不过其他几位入围演员嘅演出都唔可以忽视,又要睇下手中有一票嘅相关人士会唔会对渠投下呢一票了~


林雪《杀出个黄昏》
1986 年加入香港电影圈嘅林雪,参演过唔少电影,喺 2000 年首次凭《枪火》获得金像奖嘅最佳男配角提名,今次系渠第 3 次获得呢个奖项嘅提名。

喺渠以往嘅电影演出中,唔少角色都系配角。今次喺《杀出个黄昏》饰演杀手三人组嘅车手叶一丛,戏份就相对较重,亦系 3 条故事线中嘅其中一条。特别系渠对颜子菲饰演嘅性工作者菁菁动情,可惜襄王有心,神女无梦,到最后仲畀「人情」祝福渠结婚嘅情节都令好多观众留下印象。喺戏中其他场口嘅演出亦获得好多好评,所以都系有力嘅夺奖候补。


冯皓扬《妈妈的神奇小子》
演员 IG:https://www.instagram.com/masonfung1005
冯皓扬 (羊羊) 喺拍摄嘅时候年仅 14 岁,到小薯仔落笔呢刻都只系 17 岁,系所有入围演员中年纪最细嘅一个。年纪轻轻嘅渠,早前经过深思熟虑后亦决定咗休学,成为一个全职演员。

戏中,渠饰演苏桦伟嘅少年版,好多人都觉得渠同成年版苏桦伟 (梁仲恒) 都将角色演得形神兼备,令唔少观众都觉得有惊喜!渠嘅演出相信都会为一众相关人士喺投票时增加苦恼。

而除咗最佳男配角,渠同时都凭呢套电影获得最佳新演员嘅提名!


柯炜林《浊水漂流》
演员 IG:https://www.instagram.com/willallwailam
柯炜林 (Will) 喺 2016 年拍摄咗人生中第一套长篇电影《点五步》,呢套电影为渠打开咗知名度,之后除咗电影,都陆续演出咗唔少类型嘅作品,包括剧集、MV。而今次系渠参与电影演出后,第一次获提名金像奖最佳男配角。

喺《浊水漂流》中,渠饰演身上成日带住口琴,患有失语症嘅「木仔」,系位年青嘅露宿者,亦被吴镇宇饰演嘅辉哥当系仔一样。因为角色设定,渠喺戏中几乎冇对白,所以要透过其他方式去表达情绪同将「木仔」嘅人物性格表现出嚟,渠演绎呢个角色都获得唔少正面评价~

同羊羊一样,渠同时都凭呢套戏获得最佳新演员嘅提名!


谢君豪《浊水漂流》
谢君豪喺舞台剧同电影版《南海十三郎》中嘅精彩演出,仍然令人回味。之后渠参与演出嘅舞台剧同影视作品,亦奠定咗渠喺观众心中,系位好戏之人。今次系渠自 2000 年凭《千言万语》获得金像奖最佳男配角嘅提名后,第 2 次入围呢个奖项。

喺电影里面,渠饰演由越南嚟到香港,人生起伏好大嘅难民「老爷」。比起渠以前演出嘅角色,今次嘅造型同演绎都有个好大嘅转变,好多人喺睇嗰阵未必第一时间会认得系渠。而且渠同个仔视像通话嘅嗰一幕,唔少观众都赞渠嘅情绪变化同面部表情非常细腻!唔知呢一幕又会唔会打动到相关人士,为渠投下一票呢?

以上嘅电影中,《浊水漂流》及《梅艳芳》都已经串流上咗香港 Disney+!大家可以喺金像奖颁奖礼前重温各位入围演员嘅演出。
未有 Disney+ 睇唔到?立即订阅:http://disneyplus.bn5x.net/e42ooX


撰文:小薯仔
资料来源:维基百科、香港电影金像奖网页、媒体访问及网上资料
照片来源:《梅艳芳》、《杀出个黄昏》、《妈妈的神奇小子》、Blacklight Artist Management Facebook;柯炜林 Instagram;「安乐影片 Edko Films Ltd」YouTube 上载之《杀出个黄昏》电影制作特辑影片截图;Yahoo 奇摩电影《浊水漂流》页面


延伸阅读:
哥哥张国荣5套电影推介 当中有你钟情嘅作品吗?
https://timable.com/blog/2163967

【金像奖2022】金像奖4位入围最佳男主角 大前辈同新人边位会脱颖而出?
https://timable.com/blog/2174406

【金像奖2022】金像奖5位入围最佳女主角 前辈新人各有优势
https://timable.com/blog/2163068

【金像奖2022】金像奖5位入围最佳女配角 前辈新人竞争激烈
https://timable.com/blog/2150199

【金像奖2022】今届角逐各奖项嘅电影你睇过几多?一文整理20套获提名电影
https://timable.com/blog/2133881


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app