呢一两年,好多好耐冇活动、冇出歌嘅二代韩国团体都因为唔同节目,再次出现喺大众嘅视线里面,唤醒返大家当年嘅回忆。而今篇小薯仔所介绍嘅团体,应该都系好多粉丝嘅青春:


东方神起 (동방신기 / TVXQ!;日本用:TOHOSHINKI)
成员:
郑允浩 (정윤호;유노윤호 / U-Know Yunho / 瑜卤允浩)
沉昌珉 (심창민;최강창민 / Max Changmin / 最强昌珉)
金在中 (김재중;영웅재중 / Hero Jaejoong / 英雄在中,现已退团)
朴有天 (박유천;믹키유천 / Micky 有天,现已退团)
金俊秀 (김준수;시아준수 / Xiah 俊秀,现已退团,并改做「XIA」)
出道年份:2004 年 (大多数都以 2003 年 12 月 26 日嘅正式亮相嚟做出道日)
代表作:
〈주문 - MIROTIC〉
https://www.youtube.com/watch?v=NvxxChFqsaw

〈Rising Sun〉
https://www.youtube.com/watch?v=xQ635vE2RQI


SM 娱乐为咗打入海外嘅亚洲圈子 (特别系中文地区),所以首次打算用汉字做团体名,本身嘅候选名有「五脏六腑」同「东方不败」,最后喺创办人李秀满嘅提议下,就起用咗「东方神起」作为组合名,意思系东方之神升起。而渠哋亦成功做到「神迹」,最高峰时官方 fans club 拥有超过 80 万粉丝,当时仲入埋健力士世界纪录!仲系韩国嘅偶像团体里面,少数所有成员都可以做到合声效果嘅!而渠哋嘅成功亦令之后好多新人都跟住同一模式,可以话系令韩国偶像团体再次兴盛嘅始祖!

出道曲〈HUG〉喺 SBS 电视台嘅人气歌谣获得 3 个星期嘅第一位,同年仲喺各个主要嘅音乐颁奖礼中大丰收,用咗好短时间就成为韩国顶尖嘅明星。不过喺韩国嘅活动时间未系好长,好快就去咗日本出道,不断推出单曲同上节目,令渠哋喺当地嘅人气同知名度与日俱增,只系用咗两年时间就登上咗日本嘅武道馆开演唱会!到而家喺日本仍然有非常多嘅粉丝~

而 2008 年 9 月,渠哋喺韩国就推出〈MIROTIC〉呢只碟,反应非常好,同名主打歌仲红遍韩国!无论你系唔系 Cassiopeia (粉丝名称),只要一响起音乐,就会自动跟住唱,跟住应援方法一齐嗌!呢首歌甚至仲被选为「考试禁曲」!唔少后辈都好中意翻唱㗎~


(左:沉昌珉、郑允浩;右:金俊秀、金在中、朴有天)

但系 2009 年,成员金在中、朴有天同金俊秀就同 SM 娱乐发生合约纠纷,离开咗公司同团体,另外组成「JYJ」 (注:朴有天喺 2019 年已退出组合);而喺 2011 年开始,郑允浩同沉昌珉就继续以东方神起嘅名义进行活动,直到现在。


SS501 (더블에스오공일)
成员:金贤重 (김현중)、许永生 (허영생)、金奎钟 (김규종)、朴政珉 (박정민)、金亨俊 (김형준)
出道年份:2005 年
代表作:
〈내 머리가 나빠서 (因为我太傻)〉
https://www.youtube.com/watch?v=5WjesN20UuI

〈U R Man〉
https://www.youtube.com/watch?v=zu0O4MgfeVg
以前韩国嘅偶像团体都比较少将英文字母同数字混合使用做队名,而 SS501 就系呢少数之一。队名嘅第一个 S 系指 Sun、Super、Star 等嘅单字,有对未来嘅指向性,第二个 S 就系指歌手 (Singer),至于 501 就有五位成员永远一体嘅意思,所以全个名嘅意义其实系希望「五位一体共同成为巨星」。另外,SS 都唔系单独发字母嘅发音,要连埋读「Double S」。


虽然系 DSP Media 旗下,但渠哋正式喺大众面前露面,系透过 Mnet 一个新人发掘计划节目叫「M!pick」,因为 5 位成员嘅身高同外貌都出众﹐所以节目播出后就引起咗青少年嘅关注,之后再透过 KMTV 同 Mnet 一齐搞嘅节目「SHOW!MUSIC TANK」宣布正式出道。出道同年嘅 12 月,就以 3 亿韩圜接咗广告代言,喺新人嚟讲都算系好劲嘅纪录!

去到 2009 年 1 月,队长金贤重有份出演嘅韩版《花样男子》播出后,令渠哋全队唔止喺韩国,甚至系喺亚洲嘅人气都急速上升,仲去咗好多地方开粉丝见面会!而剧集嘅插曲〈내 머리가 나빠서 (因为我太傻)〉更加成为渠哋代表作之一 (注:呢首歌本身系许永生、金奎钟同金亨俊三位成员主唱)!

不过去到 2010 年,因为合约到期,渠哋各自都签咗新公司后,就维持住「单飞不解散」嘅状态,直到呢刻都未再有 5 个人嘅团队活动。(只系 2016 年,许永生、金奎钟同金亨俊组成咗 Double S 301 做小分队活动)


Super Junior (슈퍼주니어 / SJ)
成员:利特 (이특;朴正洙 / 박정수)、金希澈 (김희철)、艺声 (예성;金钟云 / 김종운)、神童 (신동;申东熙 / 신동희)、银赫 (은혁;李赫宰 / 이혁재)、李东海 (이동해)、崔始源 (최시원)、金厉旭 (김려욱)、曺圭贤 (조규현)、韩庚 (现已退团)、强仁 (강인;金永云 / 김영운,现已退团)、金起范 (김기범,现已退团)、李晟敏 (이성민,自 2017 年 7 月起未参与团体活动)
出道年份:2005 年
代表作:
〈Sorry, Sorry〉
https://www.youtube.com/watch?v=x6QA3m58DQw

〈U〉
https://www.youtube.com/watch?v=oGdmuY4eqlE
喺 Super Junior 出现前,韩国系从来冇出现过一队咁多人嘅团体,亦冇团体成员系中国人,而呢队组合做咗以上呢两点嘅「先锋」。本身仲系个 12 人实验性限定组合叫「Super Junior 05」,諗住活动 3 个月就解散,然后就换人做「Super Junior 06」,但系 2006 年加入咗曺圭贤之后就固定咗 13 位成员,同时亦组成咗唔同嘅小分队。

2006 年 8 月同 2007 年 4 月,发生过 2 次非常严重嘅车祸,令其中几位成员受重伤,所以追得比较耐嘅粉丝们提起渠哋,好多都会伴随住一种庆幸-好彩而家仲可以见到渠哋。


去到 2009 年,推出第三张韩语正规专辑《Sorry, Sorry》,凭住容易记忆嘅旋律同重复嘅单词,同名主打歌可以话系红到发紫,周围都「Sorry Sorry Sorry Sorry」同跟住渠哋搓手,仲令渠哋变成亚洲人气王,好多媒体亦开始用「韩流帝王」嚟称呼渠哋!不过呢只亦系最后一只 13 位成员一齐出现嘅碟,因为同年年尾,韩庚就同 SM 娱乐发生合约纠纷,离开公司同退团;金起范宣布专注戏剧发展,唔再参与团体活动 (挂名直到 2015 年同 SM 约满同时退团);2019 年,强仁亦因为个人负面新闻,宣布退团。

其实除咗音乐之外,渠哋由成团开始就已经活跃喺唔同嘅综艺节目,亦从来唔掩饰出色嘅综艺感,有时仲玩到好疯狂!有几位成员甚至做埋综艺节目主持人㖭~


BIGBANG (빅뱅)
成员:T.O.P (崔胜铉 / 최승현)、太阳 (태양;董咏培 / 동영배)、G-Dragon (权志龙 / 권지용)、大声 (姜大声 / 강대성)、胜利 (승리;李升炫 / 이승현,现已退团)
出道年份:2006 年
代表作:
〈하루하루 (HARU HARU)〉
https://www.youtube.com/watch?v=8OAQ6RuYFGE

〈Fantastic Baby〉
https://www.youtube.com/watch?v=AAbokV76tkU
讲到二代团嘅其中一个代表团体,又点可以唔提 BIGBANG?渠哋嘅团名取自宇宙大爆炸 (The Big Bang Theory),系希望可以为韩国音乐界,甚至喺全世界带嚟爆炸性嘅影响,而渠哋都的确成功做到呢样嘢!不论系团队,定系个人推出嘅音乐作品都风格多变,亦具有非常强烈嘅个人特色,所以都非常受欢迎!亦影响咗好多后起之秀 (不论系音乐上,抑或系时尚潮流上)。

啱啱出道嘅时候,其实系行 Hip Hop 风格嘅,不过就唔算话好高知名度。第二年推出《Always》呢只细碟就加入咗电子音乐,仲由 G-Dragon 负责创作大部份歌曲,成绩非常好,而主打歌〈거짓말 (Lies)〉更加令渠哋人气高涨!而 2008 年出嘅〈하루하루 (HARU HARU)〉更加系韩国最畅销嘅单曲之一!

但系讲到真正推渠哋上国际舞台嘅,非 2012 年《Alive》呢只碟莫属!销量非常高之余,仲跻身美国 Billboard 200 大专辑榜排行榜中嘅第 150 名,系第一个韩国艺人以韩语专辑入榜!碟内其中一首主打歌〈Fantastic Baby〉,亦红到不得了,就算系唔听 K-pop 嘅人都会识一句「Wow Fantastic Baby」!与此关联,并持续接近一年嘅世界巡回演唱会更加为渠哋动员咗超过 80 万观众!之后高人气就一直维持,仲越嚟越劲~


因为成员陆续入伍嘅关系,所以 2018 年开始就暂时停止咗团体活动。然而喺 2019 年,成员胜利因为个人问题,宣布退团同时退出演艺圈,令 BIGBANG 正式变成 4 人组合。嚟紧嘅 4 月 5 日,渠哋就会首次以 4 人形式推出新歌〈봄여름가을겨울 (Still Life)〉!


撰文:小薯仔
资料来源:维基百科、Namu Wiki 及网上资料
照片来源:the qoo 网站;TVXQ!、JYJ、Super Junior Facebook;Spotify SS501 歌曲页面;DSP Media;Namu Wiki;BIGBANG 官方网站;imdb


延伸阅读:
【Friday 那些年】和你数一起追过的韩国男子团体 #1
https://timable.com/blog/2151148

5首落雨会諗起嘅韩文歌 听开K-Pop嘅你应该唔会未听过
https://timable.com/blog/2156003


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app