YouTube 影片


相信大家都仲记得喺 2020 年 12 月,Netflix 就上咗一套改编自日本漫画家麻生羽吕同名漫画嘅日剧,叫《今际之国的有栖》(台湾译做《今际之国的闯关者》) 。呢套漫改剧一上架之后就大受欢迎,有唔少观众都大赞故事设定、剧中游戏同视觉效果等嘅元素非常吸引渠哋追落去,个个都话好紧张好刺激!


Netflix 喺套剧上咗架两个星期后,就宣布会制作第二季。而今日,日本 Netflix 嘅官方社交平台就 post 咗一众主要演员,包括山﨑贤人、土屋太凤、村上虹郎、三吉彩花、樱田通、朝比奈彩、青柳翔 同仲里依纱嘅煞科感言,山﨑贤人都喺自己嘅社交媒体上放咗煞科嘅相。最重要系,渠哋都喺 caption 写咗《今际之国的有栖》第二季会喺 2022 年 12 月,喺全球嘅 Netflix 独家上架!讲咗两年嘅第二季终于都有确实消息,一众剧迷漫画迷应该都好兴奋!

讲咗咁多,不如趁呢个时间嚟重温下《今际之国的有栖》第一季嘅故事概要同呢季一啲主要角色简介:


第一季一共有 8 集,描述无所事事嘅「玩家」有栖良平同两个朋友被困喺今际之国-一个平行时空下嘅东京。渠哋同其他一齐被困嘅「玩家」们,被逼参加一系列既危险又暴虐无情嘅「游戏」,而游戏类型同难度都由啤牌嘅 4 个花色决定。喺第一场游戏中生存落嚟嘅玩家会获得「签证」,参加嘅游戏越多,签证时间就会越长;而签证到期嘅玩家将会被从空中射出嘅红色雷射光处决。

葵扇 (黑桃) 代表要用体力取胜嘅游戏,梅花代表要团队合作嘅游戏,阶砖 (方块) 代表要「食脑」,靠智力嘅游戏,而红心就系「心理游戏」,想赢就要靠玩弄人心同背叛伙伴。


有栖良平|山﨑贤人 饰演
演员 IG:https://www.instagram.com/kentooyamazaki
渠对生活失去咗目标,又觉得同屋企格格不入,于是成日都沉迷喺 online game (线上游戏) 之中。

有一日夜晚同苅部大吉,以及势川张太,呢两位好朋友一齐出去玩嗰阵,意外地被困喺「今际之国」里面,为咗生存就不断参加各种游戏,然后发现自己擅长「红心 (♥)」游戏。


宇佐木柚叶|土屋太凤 饰演
演员 IG:https://www.instagram.com/taotsuchiya_official
身为登山 (攀岩) 高手嘅宇佐木柚叶,因为长期训练嘅关系,所以体能好好,擅长「葵扇 (♠)」游戏。而渠亦喺游戏中依靠力量存活,同时通过咗最艰苦嘅时刻。


苅部大吉|町田启太 饰演
演员 IG:https://www.instagram.com/keita_machida_official
生性骁勇善战嘅苅部大吉,本身系调酒师嚟,不过因为同老板嘅情人「有路」,而被「炒鱿鱼」。喺「今际之国」中,就同宇佐木柚叶一样,擅长「葵扇 (♠)」游戏。


势川张太|森永悠希 饰演
演员 Twitter:https://twitter.com/morry0629
缺乏抱负嘅势川张太,系位非常忠诚嘅 IT 公司员工。但系渠其实最享受嘅系,同有栖良平以及苅部大吉相处嘅时间~喺「今际之国」,渠就擅长「梅花 (♣)」游戏。

然而因为喺参加名为「是生是死」嘅游戏嗰阵,他只脚被严重烧伤,所以就拖慢咗两个朋友嘅进度。


苣屋骏太郎|村上虹郎 饰演
演员 IG:https://www.instagram.com/rainbowsan
神秘安静又狡猾嘅苣屋骏太郎,擅长「阶砖 (♦)」游戏。渠同另一位玩家-水鸡光合作偷咗「海滨」创办人兼领导者帽匠嘅一副啤牌。另一方面,其实渠系一个人挖掘紧「今际之国」嘅秘密。

喺帮助有栖同宇佐木逃脱「鬼抓人」呢个游戏之后,就开始对渠哋产生咗兴趣。


粟国杜园|青柳翔 饰演
渠系「海滨」里面「武斗派」嘅大佬,亦系帽匠最好嘅朋友。每次渠喺参加游戏嘅时候,都会表现出压倒性力量嘅战士,亦系擅长「葵扇 (♠)」游戏嘅玩家。不过喺第一季嘅结局附近,渠被逼杀死咗帽匠,自此就逐渐成为一个既自恋又凶残嘅领导者。


加纳未来|仲里依纱 饰演
演员 IG:https://www.instagram.com/riisa1018naka
成日展现微笑嘅加纳未来系个优雅而神秘嘅女人,擅长「红心 (♥)」游戏。渠喺「海滨」嘅地位非常重要,亦系喺剧情发展中一个非常关键嘅角色。喺第一季嘅结局,她就开启咗收集人头牌 (J、Q、K) 嘅第二阶段游戏。

原着漫画嘅第二季就系下一轮游戏嘅开始,亦会出现人头牌 (J、Q、K) 嘅关卡;而「今际之国」嘅国民都会登场同一众玩家玩游戏。究竟剧集嘅第二季会唔会跟返呢个走向呢?又会加入咩新嘅角色?大家一齐拭目以待!

如果对第一季嘅印象(无论系角色定剧情)都已经变得模糊,咁就要快啲上 Netflix 重温了~

注意:呢篇文章所放出嘅只系 2020 年宣布筹备第二季嘅片段,并未系真正预告。当真正预告释出嘅时候就会更新返。


撰文:小薯仔
资料来源:Netflix《今际之国的有栖》页面、维基百科、媒体报导
照片来源:《今际之国的有栖》官方网站;山﨑贤人 Instagram


延伸阅读:
【睇剧2022】Netflix 4月上架韩剧推介 打发时间实有嘢睇!
https://timable.com//zh-hk/blog/2161103

【睇剧2022】3套人气BL剧推介!睇完令腐女心大爆发
https://timable.com//zh-hk/blog/2147951

【抗疫2022】Netflix 近期韩剧推介 留喺屋企实有嘢睇!#2
https://timable.com//zh-hk/blog/2142722

【抗疫2022】Netflix 3月片单推介 留喺屋企实有嘢睇!
https://timable.com//zh-hk/blog/2140530


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app