哥哥张国荣5套电影推介 当中有你钟情嘅作品吗？

4 月 1 日本身最令人记得系愚人节，会同身边人开下玩笑。不过由 2003 年开始，每年嘅 4 月 1 日，怀念总会如约而至，因为呢日系香港其中一位最具标志性嘅人物同天王巨星，亦系海外影响力仍然深远嘅「哥哥」张国荣 (Leslie) 永远离开咗大家嘅日子。

渠个人嘅风采同气质，直到而家都依旧鲜明地存活喺大家心中，而音乐及影视作品更系有好多经典，经常被提起、被传颂。好多人喺今日都会想听下渠嘅歌，睇下渠啲戏，以表达时间冇令渠喺大家嘅记忆中褪色。

小薯仔就精选咗几套渠唔同类型嘅电影介绍畀大家：


《胭脂扣》
上映年份：1987 年
主演：梅艳芳、张国荣、万梓良、朱宝意
预告：https://www.youtube.com/watch?v=0M6r6j1g3Ek

「我想等一个命中注定嘅人出现，然后刻骨铭心爱一场，唔计较得失，唔计较结果。」－十二少

故事发生喺 1934 年嘅香港。海味店太子爷陈振邦（十二少）(张国荣饰演) 系经常流连风月场所嘅花花公子，遇上咗石塘咀绮红楼嘅名妓如花 (梅艳芳饰演)，好快打得火热，不过十二少屋企人反对，于是就走咗出嚟。最后喺山穷水尽下，十二少同如花就吞食鸦片殉情自尽。然而 53 年后，变成鬼魂嘅如花喺阴间等极都唔见十二少，于是就返上嚟人间搵渠，仲遇上咗喺报馆做嘢嘅袁永定 (万梓良饰演) 同渠女友凌楚绢 (朱宝意饰演)⋯⋯

改编自李碧华同名小说嘅《胭脂扣》，故事将叙事焦点放咗喺由梅姐梅艳芳饰演嘅如花身上，不过十二少亦都系一个非常重要嘅人物。梅姐同哥哥喺呢套戏中爱得轰烈，渠哋所起嘅化学作用，绝对令无数观众难忘。而哥哥亦曾经喺访问中提及，自己最钟意就系十二少呢个矛盾嘅角色。



《阿飞正传》
上映年份：1990 年
主演：张国荣、张曼玉、刘德华、刘嘉玲、张学友、梁朝伟
预告：https://www.youtube.com/watch?v=MeXKewVM-h0

「我听人讲呢个世界上有一种雀仔冇脚嘅，渠只可以一直咁飞呀飞，飞到攰嗰阵就喺啲风入面瞓觉。呢种雀仔一世只可以落地一次，嗰一次就系渠死嘅时候。」－旭仔

故事以 1960 年代初期为背景，旭仔（阿飞）(张国荣饰演) 自细由养母凑大，未见过生母，所以渠对每个遇到嘅女人好无情。放荡不羁嘅渠，先后同售票员苏丽珍 (张曼玉饰演) 以及舞女咪咪 (刘嘉玲饰演) 同居，又相继抛弃渠哋。之后渠决定只身去菲律宾搵生母，结果令他再次受到伤害。最后渠做咗一只无法落地的雀仔，喺飞翔中飞向死亡。

由王家卫执导嘅《阿飞正传》，难得地集合咗当时得令嘅影坛巨星演出；呢套电影喺金像奖同金马奖中攞咗最佳电影、最佳导演等重要奖项，亦令哥哥攞咗生前唯一一个香港电影金像奖最佳男主角，可以话喺渠嘅代表作之一。



《霸王别姬》
上映年份：1993 年
主演：张国荣、巩俐、张丰毅
预告：https://www.youtube.com/watch?v=QBjd8KKl27U

「我是虞姬，虞姬是我。」－程蝶衣

故事开始于 1930 年嘅北京，由哥哥饰演嘅程蝶衣同张丰毅饰演嘅段小楼都系孤儿，自细就跟住同一个师傅学戏。到咗大个啲，渠哋要决定自己专攻嘅技艺嗰阵，程蝶衣被选择做「旦」角，而段小楼就做「生」角。几年后，渠哋合演嘅《霸王别姬》已经名震当地，不过程蝶衣戏内爱上咗虞姬嘅丈夫项羽，戏外就爱上咗段小楼。

小有名气嘅两位伶人，亦开始咗两条唔同嘅路：段小楼同风尘女子菊仙 (巩俐饰演) 恋爱再结婚；悲伤又妒忌菊仙嘅程蝶衣将所有心力投放喺舞台上，仲将自己交咗畀有钱嘅袁四爷 (葛优饰演)，成为「渠嘅人」。

喺时代动乱结束后，历尽沧桑嘅程蝶衣同段小楼再喺同个舞台上合演一段《霸王别姬》，而呢次亦系程蝶衣最后一次演虞姬。

同样改编自李碧华同名小说嘅《霸王别姬》，系哥哥从影生涯中，其中一套喺国际影坛上有非凡成就嘅电影，喺各个影展上获奖无数，仲系第一套亦系目前唯一一套夺得法国康城影展最高荣誉－金棕榈奖嘅华语电影。哥哥将程蝶衣嘅一举手一投足都演得丝丝入扣，呢套戏呢个角色将渠嘅演技推向颠峰，系渠嘅一个里程碑。



《春光乍泄》
上映年份：1997 年
主演：梁朝伟、张国荣、张震
预告：https://www.youtube.com/watch?v=IP7Jay7IiBU

「不如我哋从头嚟过。」－何宝荣

呢个故事主要发生喺阿根廷，围绕黎耀辉（梁朝伟饰演）同何宝荣（张国荣饰演）呢对恋人。由香港去到阿根廷，两个人都系处于分分合合嘅状态。有一日，何宝荣买咗盏灯，渠同黎耀辉都觉得靚，于是就出发搵灯上嘅伊瓜苏瀑布。不过途中荡失路，仲开始发生争执，最后何宝荣主动提议暂时分开下。

两个人分道扬镳后，咁啱都去咗布宜诺斯艾利斯生活。渠哋某日喺黎耀辉工作嘅酒吧中重遇后，亦发生咗好多事。最后黎耀辉选择离开何宝荣同布宜诺斯艾利斯，再次返到香港。

「兜兜转转行咗好多冤枉路，我终于嚟到伊瓜苏。我觉得好难过，因为我始终觉得企喺呢个瀑布下面应该系两个人。」－黎耀辉

呢套电影亦系由王家卫执导，以独特嘅拍摄手法被认为系呈现电影美学嘅经典之作，甚至有人话渠系艺术电影㖭～而哥哥同梁朝伟呢个组合，亦已经系可一不可再。


《枪王》
上映年份：2000 年
主演：张国荣、方中信、黄卓玲、陈法蓉、谷德昭

「你返到屋企之后做呢个动作一百次，一千次。直至你每次瞄准嘅目标都准确。一开枪就只有一个目的，就系要赢！」－Rick 彭奕行

由哥哥饰演嘅彭奕行 (Rick)，系热爱枪械同射击嘅实战射击（IPSC）比赛高手，同时亦系改枪能手；任职重案组高级督察嘅苗志舜 (方中信饰演) 亦同样热爱枪械同射击。喺一次比赛中，两人实力不分高下，不过比赛中途就发生咗意外，令 Rick 举枪自卫杀咗人，呢次事件亦令渠患上心理障碍。之后渠牵涉入一宗凶杀案，警方甚至扣押埋 Rick 嘅女朋友，令 Rick 公然挑战由苗志舜为首嘅专案小组，甚至同警队火拼，枪伤 / 杀咗好多苗志舜嘅同事⋯⋯

呢套电影可能喺哥哥出演嘅作品中比较冷门，不过其实系渠喺角色上有突破嘅一套电影，因为系渠第一次 (亦系最后一次) 正式扮演反派。呢个角色既复杂又多层次，仲有内心戏同各种情感转变，哥哥就将自己嘅演绎发挥到淋漓尽致，亦获得好多好评！好多人甚至觉得呢套系渠隐藏嘅「神作」。

由于篇幅所限，小薯仔冇办法将渠拍过嘅众多电影一一列出，只系拣选咗啲自己主观上比较钟意嘅出嚟。如果大家希望了解更多渠同渠嘅作品，可以到维基百科 https://zh.wikipedia.org/wiki/%E5%BC%B5%E5%9C%8B%E6%A6%AE 慢慢睇。


撰文：小薯仔
资料来源：维基百科、Yahoo 奇摩电影《阿飞正传》、《霸王别姬》页面
照片来源：英皇戏院、甲上娱乐 Facebook；Yahoo 奇摩电影《阿飞正传》、《霸王别姬》页面；IMDb


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下载Timable App，随时随地捕捉本地活动资讯
iOS/Android：https://bit.ly/timable_app