虽然噚晚呢套剧集已经完结,不过既然写咗甜蜜蜜嘅「夏泰 CP」,冇理由唔写埋大家都对对方一见钟情,仲为观众展现咗火辣辣成人式恋爱嘅「LINE CP」-车成勋同埋陈映书㗎嘛!


唔讲咁多,同小薯仔一齐嚟睇下演员金旻奎同薛仁雅嘅靚相,仲有渠哋嘅一啲简单介绍先:


金旻奎|饰演 车成勋
演员 IG:https://www.instagram.com/mingue.k


戏内嘅车成勋秘书,工作上有能力,对社长忠诚,性格上又温暖体贴。而现实中嘅金旻奎亦系一位暖男嚟㗎!喺出道前,渠有次同朋友聚会嗰阵祝大家新年快乐,有朋友录低咗仲摆埋上网,估唔到呢段片好多人睇,于是就令渠喺自己居住嘅区域中有小小名气。

渠喺戏中有几幕健身嘅场面,展露出强壮嘅好身材,令大家非常羡慕;戏外都系运动实力派,因为渠由 5 岁开始,直到中学时期都系游水选手,亦有健身同做运动嘅习惯,仲系成日嗰种!甚至保龄球,渠都好钟意打㗎~


另外,渠同「社长」安孝燮一样都系位非常标准嘅猫奴 (虽然本人系公认嘅狗狗相)!屋企本身养咗两只猫猫,一只叫 「时安」(音译,韩文原名系 시안),一只就叫「Kuhn」(音译,韩文原名系 쿤이),之后仲养多只叫「Shami」(音译,韩文原名系 샤미)。渠甚至话过猫猫系世界上最靚同最可爱嘅,好似杂志封面啲模特儿㖭!


其实之前渠已经出演过唔少剧集,好似系《Signal》、《雪降花》,亦间中有喺啲综艺节目上亮相。虽然未必系每次有好多戏份,但系都逐步为渠累积咗一定嘅人气,而去到《社内相亲》就令留意渠嘅人急速增加!

除咗以上几样,渠亦拥有一副好歌喉~喺《社内相亲》播出后,唔少人都搵返渠当年以其中一名神秘歌手嘅身份上《看见你的声音》第四季嘅片段嚟睇:https://www.youtube.com/watch?v=BwkC_3E1wBw


薛仁雅|饰演 陈映书
演员 IG:https://www.instagram.com/_seorina


剧中嘅陈映书虽然系集团太子女,但系性格直率可爱。而现实嘅薛仁雅,都同映书一样,开朗活泼~喺真正做演员之前,渠曾经喺一间娱乐公司做过将近 4 年嘅练习生 (因为嗰阵公司就同渠讲做咗偶像都可以做演员,相反亦然,渠自己都系咁觉得),而当时训练出嚟嘅舞蹈同歌唱实力,亦喺演戏路上帮渠好多。


有样有身材有实力嘅渠,亦系《社内相亲》中喜爱动物嘅一份子!同两位男演员唔同嘅系,渠系标准狗奴,养咗一只叫 Julie 嘅狗狗,喺渠个人嘅社交平台上,成日都会见到渠同 Julie 嘅生活小点滴~

而且同其他 3 位演员一样,渠亦充满运动细胞!细个嗰阵学过跆拳道,仲有学巴西柔术,近期亦开始玩滑板!除咗动态活动,喺屋企静态嘅自弹自唱亦系渠有时间就会做嘅事。


周末剧《明日也晴朗》为渠真正打开大众知名度,《哲仁王后》令渠嘅演技获得大众好评,而《社内相亲》就令渠嘅人气创高峰,获得更多人嘅喜爱!

虽然两位演员暂时都未有出演下一套作品嘅消息,亦未知几时会再合作,不过小薯仔未来都会期待两位各自嘅挑战㗎!

最后放上渠哋前几日喺电台中嘅一小段合唱啦:https://www.youtube.com/shorts/m52RGywMqAM

撰文:小薯仔
资料来源:维基百科、媒体报导
照片来源:金旻奎、薛仁雅、@sbsdrama.official、@happytribe_ent Instagram


延伸阅读:
【睇剧2022】《社内相亲》「社长」安孝燮 x「夏莉」金世正 靚相+简介
https://timable.com//zh-hk/blog/2166294

【睇剧2022】Netflix 4月上架韩剧推介 打发时间实有嘢睇!
https://timable.com//zh-hk/blog/2161103

【睇剧2022】韩剧《二十五,二十一》5大拍摄取景地 回忆心动的青涩恋爱
https://timable.com//zh-hk/blog/2153782

【睇剧2022】3套人气BL剧推介!睇完令腐女心大爆发
https://timable.com//zh-hk/blog/2147951

【抗疫2022】Netflix 近期韩剧推介 留喺屋企实有嘢睇!#2
https://timable.com//zh-hk/blog/2142722


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下载Timable App,随时随地捕捉本地活动资讯
iOS/Android:https://bit.ly/timable_app