王灝兒(JW)2010年出道,一首《矛盾一生》唱到街知巷聞,2016年喺Star Hall
開過兩場「Stage of Grief」 演唱會,JW今次終於首度踏上紅館,而且仲係2018年嘅第一個紅館演唱會。記得前年演唱會前嘅三個禮拜,連續出咗三首快歌,今次就只係推出咗《I Just Wanna Stay With You》一首演唱會主題曲。JW今次演唱會都花咗唔少功夫做宣傳,例如喺唔同大學快閃,但最後都未見黃牛炒到貴一貴嘅情況,不過,唔係9成黑絕望座位表其實係好值得表揚的!

入場見到在座都有九成滿,開場前嘅House Music係落雨、行雷聲(原來係為咗濕身部份作鋪墊)。演唱會大約喺8點40分開始,台前延伸舞台有一個正方形盒,著住黃色露肩長裙嘅JW唱住《太空人》出場,正式為第一場、亦都係唯一一場嘅紅館演唱會揭開序幕。

1. 太空人
2. 自由飛翔
3. 敢抱未敢愛
4. 你帶著我的青春離去


演唱會嘅舞台設計亦相當有心思,投影係LED螢幕嘅舞台就如一個大牢籠,Dancers揮動住有JW名字嘅旗幟。雖然歌曲節奏上面轉換得有點突然,但JW嘅表現相當淡定,現場演唱亦非常穩定,好有壓台感。

5. Unfaithful (Rihanna cover)
6. 飄浮女孩
7. Juicy Girl
8. On My Own (Les Misérables cover)

JW去年5月上載咗同關楚耀係K房合唱《不該》,今次將表演搬到上大舞台,關楚耀係過場嘅小劇場片段飾演JW嘅前度,兩人分別企係樓梯上面合唱,真正係由K房唱到上紅館。

當唱到《妒忌心》被男Dancers拋來拋去,睇得出苦練咗好多次,到Music Break嘅時候更係整晚演唱會嘅亮點,台上嘅灑水營造落雨效果,全身濕透嘅JW冇即刻返落台下換衫,之後再企係鋼琴上面落力獻唱《孤單不要拍》, JW冇被雨水影響,好專業咁唱曬成首歌,全場嘅觀眾亦都好自然拎出電話開著燈,為JW演唱會精彩嘅呢一幕加上一點點嘅光芒。(呢次嘅落雨效果同濕身演出令我諗起林俊傑JJ、容祖兒同郭富城都曾經係紅館玩過水)

JW之後行到台嘅另一邊,升降台上面嘅係吳業坤,重有毛巾同暖水壺,合唱《原來只因深著》同時坤哥幫JW披上浴袍保暖。當JW返到後台嘅時候,關楚耀出現同坤哥合唱《男人信甚麼》,JW後來講笑話呢首歌好岩佢地唱,因為呢兩個男人都信唔過。

9. 不該 (關楚耀合唱)
10. 掛住你
11. 我們都寂寞(陳奕迅cover)
12. 妒忌心
13. 孤單不要拍
14. 原來只因深著 (吳業坤合唱)
15. 男人信甚麼 (關楚耀 吳業坤合唱)


JW喺唱出道作品《掛念好友》嘅時候落台握手,之後一連串快歌亦帶起全場嘅氣氛。歌手喺演唱會通常都會逐一介紹Band嘅成員同Dancers,今次嘅Credit唔係由JW講出黎,觀眾可以喺大大嘅LED螢幕上面逐一見到嘅面孔,係對呢群重要班底嘅尊重,值得一讚。

16. 掛念好友
17. Runaway
18. Feel the Bass
19. Stupid BOII
Credit Band +Dancers


JW一向好鍾意迪士尼電影嘅主題曲,今次重揀咗《The Little Mermaid》同埋《Beauty and the Beast》嘅歌曲,好適合佢唱。當唱《小故事》台上面嘅彩虹色燈光配合埋螢幕上嘅歌詞「相信 堅持 能成就我的第一次」,呢一個moment令JW感動到喊,仲話「今晚係第一場,亦係最後一場,我已經將所有嘢俾曬你哋!」,當然接住有唔少得全場大合唱嘅《矛盾一生》啦!

20. 多少年
21. Part Of Your World
22. Beauty and the Beast
23. 小故事
24. 矛盾一生


上次Star Hall演唱會JW已經唱過《我代你哭》,但今次有壓軸嘉賓鄭中基合唱,氣氛當然十分熱烈,之後帶嚟嘅係首次曝光由林奕匡作曲嘅新歌《維多利亞》,同埋演唱會主題曲《I Just Wanna Stay With You》。演唱會嘅尾聲由《安全感》作結,「我係JW,我哋下次見!」

Encore
25. 我代你哭 (鄭中基合唱)
26. 維多利亞 (新歌)
27. I Just Wanna Stay With You
28. 安全感


演唱會大約喺十一點完場,雖然只得一場,但製作上絕不慳皮,不論舞台設計上有淋雨、煙花、大LED螢幕,服裝、燈光等,加上整個演唱會嘅歌曲編排都大致流暢,冇咩悶場位置十分驚喜。相信,堅持,能成就你嘅第二、三次!

報導及攝影: Jamie Leung