【植物X輕食】大埔貨櫃屋小店 每星期營業一天

位於大埔嘅Mr Cardigan plant house係一間以植物盆栽做主題嘅小店，店內可提供嘅食物款式唔多，有花茶、咖啡、多士同蛋糕。雖然小店唔係主打食物，但就啱哂鍾意影相打卡，或者鍾意盆栽種植嘅你。因為店內外都擺滿植物盆栽擺設，就好似一間小型溫室，有啲盆栽仲可以即場購買。遠離城市，望到嘅都係店主精心打理嘅植物，加上音樂同輕食，絕對係超理想嘅假日活動。




食物款式唔多，但擺盤上餐一樣細心！客人用餐時發現碟上有塊葉，當然唔係用嚟靚咁簡單，係店主自手種植嘅香草或食用花，係比俾客人指尖留香！用力摸摸塊葉，咁就成日都聞到香味啦。


由於Mr Cardigan plant house嘅環境設計太好影，小店經常被人借嚟拍攝用，所以去之前最好上佢哋專頁查看。小編認為一年可以到訪小店幾次，因為植物跟隨時節會有唔同變化，今季到訪完，下季再去時已經係不一樣嘅光景。最後，小店每星期只有星期日營業，想去嘅就要留意吓啦！

Mr Cardigan plant house
地址: 大埔山寮路路口白色貨櫃(大尾督)
營業時間: 逢星期日14:00-18:00(特別開放會另外公告)
如何前往: 大埔墟火車站75k巴士 / 20C小巴，於山寮站下車。

圖片: Mr cardigan plant house FB專頁
撰文: ZOE