【文青去邊好】將軍澳人氣Café推介 最新寵物友善Café / 文青小店 / 靚景打卡合集
作者: Timable, 2021年3月11日 (四) 上午10時25分
今期將軍澳都頗受歡迎，唔少人週末都鍾意入去行下，近年亦進駐咗唔少特色咖啡店，加上地點清靜又有靚景，都幾適合靜靜地坐下，輕鬆過一個休閒下晝。以下就為大家集合咗6間將軍澳人氣Cafe，仲有最新開嘅寵物友善Cafe，無論喺文青風定工業風，嘆到靚咖啡之餘仲有咁chill嘅環境，總有一間適合你!
Stay With Cafe
最新推介嘅有位於藍塘傲嘅Stay With Cafe，店舖行型格工業風，店內有唔少精緻小物及擺設都睇得出老闆嘅小心思，金屬配以木質嘅傢俬加上水泥牆嘅襯托，相當有格調。店內嘅手造吊籃、室外座位以及窗口嘅吧枱設計，亦喺非常「打卡able」。店舖更加喺寵物友善，提供寵物menu，狗仔都有afternoon tea set! 大家可以帶埋心愛嘅毛孩一齊過返個Chill Chill下午啦!
食品方面提供All Day Breakfest、各種特色意粉及小食等等，較特別嘅有脆炸牛油果條、明太子大蝦意粉配紫菜天婦羅脆脆。飲品方面選擇都幾多，除咗咖啡及來自台灣種植嘅茶品之外，特別推介有主打嘅Tiramisu coffee，店主形容喺一杯飲得嘅Tiramisu，特意調教嘅味道唔會太甜膩，無糖可可粉、咖啡和Tiramisu Cream互相中和配合，加上乾花及食用花點綴，賣相同味道都非常吸引。
營業時間:
星期二至日 11am - 6pm | 星期一 全日休息
地點:將軍澳唐賢街29號藍塘傲地下3B號舖
Urban Coffee Roaster
另一間都喺行工業風嘅有去年年尾喺將軍澳新設分店嘅Urban Coffee Roaster，貫徹銅鑼灣及尖沙咀分店嘅輕工業風裝潢，而新店座落喺海濱長廊嘅鋪位，陽光透過大玻璃窗照入店內，非常舒服，鍾意睇住海景嘆靚咖啡嘅你就最啱喇! Urban Coffee Roaster喺本地精品咖啡品牌，堂食以外，唔少咖啡愛好者都會購入店舖自家烘培嘅咖啡豆。店舖以高質咖啡豆製作多款手沖咖啡，食品主打輕食和fusion菜色，提供不少清新之選如牛油果配無花果多士及手撕豬肉配賓尼迪蛋; 甜品方面法式焦糖班戟亦值得一試。
營業時間:
星期一至日 8am - 10pm
地點: 將軍澳唐賢街29號藍塘傲地下12號舖
JOMO Coffee and Cakes
鍾意日系小清新風格嘅，可以嚟JOMO Coffee ad Cakes，店內純白日系裝潢，走簡約嘅文青風格，亦設有戶外露天座位。店舖嘅咖啡由本地咖啡烘培房Roast Work提供，以巴西、哥倫比亞、危地馬拉及印尼混合以成，入口帶有獨特的榛子、焦糖和可可風味。JOMO設有自家烘培餅房，提供穩定質素同供求量。自家製嘅糕點都相當受歡迎，賣相亦十分精緻吸引，主打有戚風蛋糕及巴斯克焦香芝士蛋糕，而糕點同其他食品更有純素選擇適合唔同人需要。
營業時間:
星期一至五 9am - 6pm | 星期六及日 9am - 7:30pm
地點: 將軍澳唐俊街二十三號澳南海岸地下G01
Ocio
喺近坑口站東港城，就有一間裝潢精緻，環境幾適合放鬆嘅日系咖啡店。店內有唔少可愛掛畫作裝飾，淺木色家具加上純白色牆身，好少女啊! Cafe主打甜品，選擇頗多，招牌嘅鑊仔Pancake，仲有各種甜品窩夫，都係必試之選!
營業時間:
星期一至五11:30am - 10:30pm | 星期六及日 11am - 10:30pm
地點: 將軍澳坑口重華路8號東港城2樓238號舖
NOC Papillons & Bakery
人氣急升嘅本地咖啡品牌NOC Papillons & Bakery咖啡店，喺翩匯坊開設嘅新店已經喺第六間分店，佔地4,000平方尺，舖內間隔分明，枱與枱之間空間十足，相當寬敞! 店舖裝潢極簡約，以水泥灰配純白色，充滿時尚感。NOC嘅咖啡以高質素咖啡豆製成，更會按照不同季節精選世界各地風味獨特嘅咖啡豆。店內更設有自動販賣機，供客人們選購喜歡嘅咖啡掛耳包。將軍澳分店更喺首家自設開放式餅房嘅分店，每日提供新鮮出爐嘅自家製糕點，客人仲可以睇到製作過程，首推嘅有人氣焦糖蛋撻。
營業時間:
星期一及三 8am - 6pm | 星期二、四至日 10am - 6pm
地點: 香港新界將軍澳唐俊街21號翩匯坊地下1A號鋪
牧羊少年咖啡館
深受文青歡迎嘅牧羊少年咖啡館，喺香港首家以旅遊為主題嘅咖啡店，除咗飲食之外，咖啡店仲會定期舉辦各種文化、藝術活動，好似旅遊分享會、音樂會、文創比賽、攝影展、二手書回收運動和青少年社福咖啡班等等，咁多年嚟都儲咗唔少擁躉㗎。全港現時一共有7間分店，將軍澳店則位於香港單車館公園，去年曾經翻新店舖，以日式木系裝修為主，更加有單車元素嘅裝飾品，非常配合單車公園嘅主題。將軍澳分店亦相當寬敞，特大玻璃窗設計採光極佳，望住公園同人工湖享受咖啡非常寫意。餐飲方面，lunch set menu性價比甚高，價錢大約$62-128左右，包括餐湯、意粉及飲品，有靚景又可以靜靜地嘆個lunch都不失為一個好選擇。
營業時間:
星期一至五 11am - 10pm | 星期六及日 8am - 10:30pm
地點: 將軍澳寶康路105-107號香港單車館地下G53號
圖片來源: 網上
撰文: HL
