YouTube 影片


ViuTV 喺 2018 年首次舉行《全民造星》呢個大型嘅男子選秀節目,出咗而家人氣爆燈嘅 MIRROR,仲有 ERROR;第二年嘅《全民造星 II》,有 3 位參賽者後來組成咗 P1X3L;到咗 2021 年,《全民造星 IV》就打正旗號要組香港久違了嘅女團。


而今日—2022 年 1 月 12 號,呢隊所有成員都嚟自《全民造星 IV》最後 20 強,名叫 COLLAR 嘅女團就帶住成軍首支單曲 《Call My Name!》 正式出道,成員包括有 Marf、Gao、Day、So Ching、Candy、Winka,Ivy 同埋 Sum Ling。團名 COLLAR 本身指衫領、鎖骨,同時代表女性最迷人最具吸引力嘅位置,亦代表每次表演時,佢哋都想用最迷人嘅方式,由內到外散發出魅力,吸引大家欣賞表演。而 COLLAR 嘅標誌更會隨住唔同成員嘅組合而變色𠻹!

雖然暫時就未有公佈 COLLAR 嘅官方粉絲名稱,不過就已經有粉絲自稱做「鈕扣粉」。
(如果遲啲再多啲人講呢個名,相信都會變咗 COLLAR 粉絲嘅「官方」名稱)

講完團,一齊嚟睇下各個成員嘅資料先啦 (排名不分先後):


Marf (邱彥筒)|粉絲名稱:Muffin
IG:https://www.instagram.com/_marifemarife_/
喺參加《全民造星 IV》之前,Marf 因為熱愛表演,所以由全職嘅獸醫護士轉為兼職,同時亦做過模特兒同舞蹈員。原來佢喺中學嘅時候跟過 MIRROR 嘅排舞師 Rock Sir 學跳舞,之後獲得對方鼓勵,就去咗參加呢個節目~ 除咗 Rock Sir 之外,連 MIRROR 成員 Anson Lo 盧瀚霆同隊長 Lokman 楊樂文都曾經係佢嘅跳舞老師!

喺第一回合嘅前哨戰,佢憑住《Pass that Dutch》嘅舞蹈表演,唔單止擊敗當時嘅對手,亦獲得評判同導師嘅稱讚,同時更收穫大量網民支持,成為大熱;而喺決賽,佢就用自己作曲填詞,由另一位參賽者黃斯琪(CK)編曲嘅作品《The Law of Attraction》出賽,評判評分同觀眾投票都獲得第一,令佢得到滿分 40 分攞冠軍,率先成為 COLLAR 一員。


隊長 Gao (沈貞巧)|粉絲名稱:餃子
IG:https://www.instagram.com/gagarieo/
Gao 喺參加節目之前,係位自由身教 Locking 嘅跳舞老師。

因為同 MIRROR 隊長 Lokman 都係跳 Locking (甚至有人話佢哋有啲角度似樣),所以畀傳媒同網民叫佢做「女版 Lokman」或者「Lok-woman」;除咗跳嘅舞種一樣,而家連喺團體內擔任嘅位置都一樣,都係隊長!

喺決賽嗰陣,佢以跳唱表演《Fly As Me x 2 Legit 2 Quit》,加上自己最擅長嘅 Locking,令大家眼前一亮,之後喺 Dance Battle 亦有出色嘅表現,最後評判評分同觀眾投票嘅總分加埋有 37 分,獲得亞軍,成為第二位率先進入 COLLAR 嘅成員。


Day (許軼)|粉絲名稱:Night
IG:https://www.instagram.com/6y_day/
Day 由高中開始跳舞,係 Kpop Cover 舞團 BRIGHTEN 嘅成員,亦入圍咗 2021 香港區 K-pop 舞蹈比賽—CHOOM。喺佢 16 歲嘅時候,更加自己一個人去咗韓國做半年練習生,不過因為疫情就中斷咗練習生生活返嚟香港。喺參加節目之前,佢都係啱啱考完 DSE~

喺決賽,佢就表演咗 Yumiko 鄭希怡嘅《相對濕度》,最後評判評分同觀眾投票嘅總分加埋有 36 分,獲得季軍,成為最後一位率先進入 COLLAR 嘅成員。


So Ching (蘇芷晴)|粉絲名稱:師弟妹
IG:https://www.instagram.com/soching_nat/
So Ching 喺參加節目之前,係一位專業嘅舞蹈員,亦係跳舞老師。佢曾經幫過唔少藝人伴舞,最近期係喺 C AllStar 嘅《C AllStar 集合吧演唱會2021》作為舞蹈員之一,亦喺 MIRROR 成員姜濤喺 2021 年推出嘅單曲《Master Class》中作為對方表演時嘅其中一位跳舞拍檔。

喺決賽,佢表演 IU 嘅《Coin》中文改編版本,最後評判評分同觀眾投票嘅總分加埋有 28 分,獲得第 6 名。


Candy (王家晴)|粉絲名稱:晴天蛙蛙
IG:https://www.instagram.com/candyw1219/
Candy 喺比賽之前,已經以標緻嘅外貌成為其中一位大熱。不過喺第一回合嘅前哨戰唱《紅綠燈》嘅時候就失準,之後畀導師許廷鏗選中成功復活。

佢喺決賽表演咗 Jace 陳凱詠嘅《收聲多謝》,係佢第一次挑戰型格嘅表演,最後評判評分同觀眾投票嘅總分加埋有 23 分,獲得第 8 名。而監製花姐亦喺決賽後接受傳媒訪問嗰陣點名讚佢進步唔少。


Winka (陳泳伽)|粉絲名稱:泳瓜
IG:https://www.instagram.com/winka_chan/
Winka 讀緊書嘅時候,已經因為唱歌而喺學校裡面少有名氣;喺大多數同輩都準備緊 DSE 嘅時候,佢就選擇咗退學,成為一個全職歌手;喺參加節目之前,更加已經有自己嘅派台歌曲。

喺決賽嘅時候,佢表演咗張惠妹嘅《母系社會》,話想送呢首歌畀社會上嘅女性同自己嘅媽媽。最後評判評分同觀眾投票嘅總分加埋有 25 分,獲得第 7 名。


Ivy So (蘇雅琳)|粉絲名稱:蘇蝦
IG:https://www.instagram.com/ivyysooo/
Ivy So 本身係香港中文大學護理系嘅學生,因為參加《全民造星 IV》呢個節目而放棄升讀。

佢係其中一位人氣最強嘅成員,亦係「外貌擔當」。

決賽嘅時候,因為參賽編號係 1 號,所以成為咗第一位出場嘅參賽者,演唱嘅歌曲係 Yoyo 岑寧兒嘅《勿念》,佢話想以呢首歌為離鄉別井嘅香港人打氣。最後評判評分同觀眾投票加埋嘅總分有 20 分,獲得第 10 名。


Sum Ling (李芯駖)|粉絲名稱:雞湯
IG:https://www.instagram.com/lisumlingg/
芯駖喺參加節目之前,已經喺跳舞界活躍多年,係一位專業嘅舞者同跳舞老師,亦有幫手組織特別嘅節日表演團隊,同埋編舞。

佢喺大學二年級嘅時候加入咗 DanSo (舞蹈學會),跟當時 DanSo 特意邀請嘅香港資深舞蹈家陳紹傑跳舞,後來仲畀對方邀請擔任助教,期間亦獲得各式各樣嘅商業演出機會;之後更加被選中成為郭富城演唱會嘅伴舞團成員之一,亦跟過孫燕姿同林憶蓮嘅團隊,做世界巡迴演出!

喺最後嘅分組賽,當時組別嘅所屬導師,MIRROR 成員 Anson Kong (AK) 江𤒹生,都有提過曾經跟芯駖學跳舞㗎!

佢喺決賽嗰陣,改編咗王菲嘅《白痴》嚟做表演,闡述返自己參加比賽嘅心路歷程。最後評判評分同觀眾投票加埋嘅總分有 33 分,獲得第 4 名。


撰文:小薯仔,各成員簡介由網上資料整理而成
照片來源:COLLAR IG


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app